Inkhârkhip laia thisen pek dan tur Blood bank leh AVBD-in an ruahman

Mizoramah Covid-19 laka invèn nan inkhârkhip a nih avangin pawl hrang hrangin blood donation camp an huaihawt thei lo a, hei vang hian blood bank ṭhenkhatin a mamawhte hnena thisen pek chhuah nghal tur an nei lo zauh zauh a, harsatna lian erawh a la thleng lo.

lood bank hrang hrangte chuan Association for Voluntary Blood Donation (AVBD) nen ṭanghoin thisen pek dan tur an ruahman. Aizawl Civil Hospital (ACH) Blood Bank hotute sawi danin, thisen thliar loh (whole blood) an nei tam rih a, thisen vâr erawh an nei mang lo a, thisen pe tharte pek pawh a zo nghal zung zung ṭhin. Hetih lai hian, thisen pek ngai an awm reng avangin thisen hmangtute rulhtir (replacement) cháng a awm fo. ACH Blood Bank chuan AVBD-te nen ṭang tlangin, pawlte'n thisen an pek dan tur an ruahman. Lockdown tìr lamah mi punkhawm tam loh dan tur ngaihtuah chungin YMA branch pathum velah donation camp an nei a, mahse, an chhunzawm tawh rih lo. April thla tîr lam aṭangin thisen pe turin National Service Scheme (NSS)-te ngen an ni a; Aizawla zirnain eng emaw zata NSS-te'n a inchhâwkin blood bank-ah kalin thisen an pe ṭhin.

AVBD leh blood bank lam chuan pawl dangte pawh thisen pe turin an ngen ṭan a; lockdown pawhsei a nih phei chuan a remchan dan angin kohhran ṭhalai pawlte leh YMA branch-te pawh ngen zel a ngai dawn niin an sawi. Synod Hospital Blood Bank hotute chuan, thisen neih khawl sa an nei tam lo a, replacement (thisen dawngtute'n an rulh ngai chi)-a an kal rih thu an sawi a, thisen mamawh a tlahniam rih a, replacement-in kan kal rih," an ti. Chutih rualin, harsatna a awm avangin tun kar khan Durtlang YMA-te thisen pe tura an ngen angin an pe a, anni vêk hian an pe leh dawn tih an sawi bawk.

Lunglei Civil Hospital Blood Bank hotute chuan, thisen neih sa an neih tam loh rualin, thisen pe an awm zauh zauh thu an sawi a, "Stock kan ngah lo a, "NSS lamin an rawn pe ṭan mek a, páwl dang erawh an reh rih," an ti. Champhaiah pawh thisen an nei tam lo a, mahse, thisen mamawh an tlem lai a nih avangin harsatna lian an la tâwk lo.

Tun kar chhung khan Adventist Youth Federation-in ni thum chhung thisen an pe a, mamawh dan azirin blood bank-ah camp neih leh an tum. Kolasib Blood Bank hotute chuan, April thla tîr khan Diakkawn Branch KṬP-te'n ni thum chhung, ni khatah 10 vel tê têin thisen an pe a, NSS lamin an pe bawk tih an sawi a, "Mamawh an tam rih lo a, emergency tih loh chu kan pe chhuak lo, emergency erawh an awm ve nual," an ti a; mamawh an awm chuan AVBD nen ṭang dunin NSS leh YMA-te ngen zel an tum thu an sawi. Serchhipa AVBD hruaitute chuan, thisen chungchangah harsatna an nei rih lo tih an sawi a, "Thisen pe turin Serchhipa KṬP bial hrang hrangte an inhawng a, demand a sang thut a nih loh chuan harsa lutuk loin kan kal thei rih ang. A ṭul a nih chuan NSS pawh an inhawng tih min rawn hrilh," an ti.

Lawngtlaia AVBD hruaitute chuan, Lawngtlai Blood Bank-ah thisen an nei tam lo a, lockdown hnuah donation camp mumal taka neih a ni lo tih an sawi a, "Tunah hian harsatna a awm chhoh zel avangin blood donation camp kalpui dan tur ngaihtuah mek a ni," an ti a; lockdown vangin LIKBKṬP leh ṬKP-te blood donation calendar anga an kal theih loh thu an sawi. Siaha-a AVBD hruaitute pawhin thisen nei tam tawk lo mah se, harsatna lian tham an neih loh thu an sawi a, "Tlâkchham tak chu kan nei rih lo. Lockdown ṭan tirh khan rei lo tê harsatna kan nei hlek a, mahse, a rei lo. MTP-te'n tlem tlemin an pe a, nu nau zai ngai leh cancer thisen pek ngai neuh neuh kan nei ve reng mai," an ti.