Jail tang 2 an tlan chhuak; a tukah man lehnghal an ni

March 27, Ningani tlai khan Mamit District Jail aṭangin mi pahnih an tlan chhuak a, an pahnih hian nimin khan man lehnghal an ni.

Mamit District Jail aṭang hian in rawk avanga kum 2023-a an man, court-in kum hnih chhung jail tang tura thiam loh a chantir Alex R Vanlalhruaia (30) s/o R Tlanglawma, Chhinga Veng, Aizawl rukruk avanga kum 2024-a man, thla ruk chhung jail tang tura court-in thiam loh a chantir Malsawmlawmpuia (25) s/o Hmingthansanga, Mamit Bazarvengte chu an tlan chhuak a ni.

Tang tlan chhuak an awm tih hriat a nih veleh Mamit Police leh Prison department-a thawktute chuan tang tlan chhuakte hi an zawng nghal a, nimin zing dar 1:30 vel khan Malsawmlawmpuia hi Mamitah man niin, nimin chawhma lamah Alex R Vanlalhruaia hi Mamit Field Vengah man ve leh a ni.

Tang tlan chhuakte hian jail complex chhunga bike pakhat an ru chhuak a, man hmasak zawk Malsawmlawmpuia thu zawhfiahna aṭangin an bike rukchhuah hi an dahna hi hriat a ni a, Mamit Venghlun Thlanmual thlang, field kawnga an dah chu nimin zing vek khan lak nghal a ni.

Mamit Police-te sawi danin, Malsawmlawmpuia hian man a nih hma hian ṭhian dang neiin, Mamit PWD Vengah mi in an rawk leh hman tih hriat a ni.