Ruihhlo kan donaah YMA-te beih let kan nih chuan a hmaah hruaitute kan ding ang - CYMA President

Central YMA (CYMA) president Lalhmachhuana chuan ruihhlo an donaah YMA-te beihlet an nih chuan a hmaah hruaitute an din zel tur thu a sawi.

Nimina Chhimphei Gropu YMA inkhawmpui Phulpui Community Hall-a a hmanpuinaah CYMA President chuan, "Ruihhloin kan hnam a eichhe mek a, a eichhiat zel loh nana ruihhlo kan do a kan beih let a ṭul takzet. Ruihhlo kan dona kawnga YMA-te lo beilet duh kan awm a nih chuan hruaitute a hmaah kan ding zel dawn," a ti.

Lalhmachhuana chuan intodelh chu kan ram leh hnam damna atana kan mamawh a nih thu sawiin, "Kan phak tawk ṭheuhah mahni intodelh tura taimak chhuah i tum ang u," a ti a, kan pawnlam lan dan leh kan incheina ringawt mawi lo a, kan nun a mawi a pawimawh thu a sawi.

YMA chu ram dang leh hmun hrang hrang aṭanga zirchian tham a ngaituten an lo zirchian fo tawh thu sawiin CYMA President chuan, "YMA hi kawng hrang hranga ram leh khawtlang tana innghahna tlak a ni," a ti.

CYMA President chuan YMA member-te'n social media an hman thiam a ṭul thu sawiin, kan nunhona leh social media-ahte pawh Zonunmawi tak hawihhawmna te, aia upa zahnate leh tlawmngaihnate hi lantira nunchhuahpui fo turin YMA member kalkhawmte a chah.