KHAWTHLIR

Minister-in hmanpui

Tuivawl Group YMA chuan nimin khan inkhawmpui vawi 2-na Maite khuaah an hmang a, an hun hmanpuitu Art & Culture minister C Lalsawivunga chuan, tunlai khawvelin a buaipui em em chu zu leh ruihtheih thil a nih thu sawiin, "Zu leh ruihtheih thildang hian mimal, chhungkua mai bakah khawtlang leh kohhran thlengin a ti chhe thei. Mipat hmeichhiatna hman khaw lohnain kan ram min tibuai nasat ta hle mai," a ti a, YMA member-te chu heng lak aṭanga inthiarfihlim tlat turin a chah.

Lungphum phum

Mizoram UPC chuan nimin khan Assembly Centre, Zonuamah assembly hall sakna tur lungphum inkhawm an buatsaih a, Mizoram UPC executive chairman Upa F Lalremmawia'n lungphum hi phumin, general superintendent Rev. P Lalrinmawia'n thu a sawi. Assembly hall sak nan hian cheng nuai 3,600 ruahman a ni.

FIR thehlut

MSU chuan social media hrang hrangah Mizorama cheng hnam peng hrang hrangte inkara inhuatna chi tuh thei dawt leh thubelhchian dawl lo thehdarh a ni fo ṭhin tih tarlangin, hetiang tih chingte zawnchhuaha hrem an nih ngei theihna atan nimin khan Aizawl Police Station, Cyber Crime-ah FIR an thehlut.

Income Tax sawiho

Income Tax Officer (TDS), Aizawl pisaah nimin khan 'New income Tax Bill, 2025' chungchang sawiho a ni a, Guwahati-a principal chief commissioner of income tax (NER) Nav Ratan Soni, NER CIT (TDS) T James Singson, CIT (admin) N Jungio leh Shillong CIT (range-TDS) Rintei Renthlei-te'n telpui. He hunah hian CYMA, MIMA, Treasury hotute leh pawl hrang hrang aiawhte telin, rawtna an neihte an thlen bakah zawhna leh chhanna hun hman a ni.

Kawng khar

PWD Aizawl Road South Sub-Division I-te'n Aizawl bypass road, Falkland Veng lei tlahniam laih zauh hna an thawh dawn avangin helai kawng hi March 31, 2025 aṭanga April 3, 2025 chhung zing dar 10 leh tlai dar 4 inkarah khar ṭhin a ni dawn. Thupek zawm lote chu Section 179 MV (Amendment) Act, 2019 hmanga hrem theih an ni.

Data training

Irrigation & Water Resources department leh National Institute of Hydrology, Roorkee ṭangkawp chuan March 26-28, 2025 chhung khan hmarchhak state-te tan 'Data Validation and Management of Hydrometeological Data' tih thupui hmangin training an buatsaih a, IWR secretary Lalrothanga'n a hawng. Training-ah hian hmarchhak state panga aṭangin State Water Informatics Centre a thawktu mi 27 an tel.

Community Intervention

Science Technology & Innovation Hub Mizoram hnuaia DL&AAA Team-te chuan nimin khan Rangvamual Community Hall-ah Community Intervention Programme kharna hun an hmang a; Rangvamual vengchhunga tleirawlte pualin digital safety leh substance abuse chungchang zirhona an buatsaih.