ZPM enkawl veng leh khawtlang chu a ṭha zawngin a danglam tur a ni - CM

ZPM chuan March 27, Nigani khan an party aṭanga local council aṭanga thlan tharte lawmpuina hun Dawrpui Multipurpose Hall-ah an buatsaih a, he hun hmanpuitu chief minister Lalduhoma chuan ZPM enkawl veng leh khawtlang chu a ṭha zawngin an danglam bik tur a nih thu a sawi.

Lalduhoma chuan VC leh LC inthlan dawnah khan an party an lo len ve tak zel avangin candidate chungchangah hun khirh tak tak an tawng tih sawiin, "Candidate inbeisei ni ta si lo mi ṭha tak tak rilru hliama awmte pawh eng emaw zat kan awm ngei ang. Khang hun harsa kan tawn zawng zawngte kha theihngilhin vawiin hlawhtlinna chang tate hian kan ṭhiante kha ngaihven zuia kuangkuah thiam ang che u," a ti.

Politic-a a awm chhung hian an thawhpui ṭhin kal sana anmahni bei zui, chumi hnua kan hnena lo kir leh an tam tawh hle tih sawiin Lalduhoma chuan, "Midangte kan ngaihdam theih loh hian a ngaidam thei lotu hi an na ve reng tho," a ti a, inngaihdam tawnna hian thawhhona ṭha a siam ṭhin thu a sawi.

Chief Minister chuan beneficiary thlan chungchangah fimkhur hle turin LC hruaitute chu chahin, "Khawtlang huapin ro rel u la, chhungkhat laina hnai aiin a mamawh leh a hlawhtlinpui turte lo dah hmasa zel ang che u. 'Kan danglam bik tur a ni', kan ti a, a lan chhuahna tur chu ZPM LC-ah pawh thleng rawh se, ZPM enkawl khawtlang chu eirukna kawngah te, taimakna kawngahte a ṭha zawngin kan danglam tur a ni," a ti.

Thusawitu dang ZPM president Lalliansawta chuan "Sorkar hian ruahmanna hrang hrangte a siam ṭhin a, a taka lo thawktute chu veng chhunga hruaitute in ni. Khawpui chhunga mipui si hnai ber in ni a, veng chhung mamawh leh mipui sukthlek pawh a hrechiang bertu in ni. Veng mipuite pawhin in lakah beiseina sang tak an nei ṭhin," a ti a, inpawhna ṭha leh thawhhona ṭha nen khawtlang enkawl turin chah.

Inkhawma tarlan a nih danin, ZPM hian local council 52 ah ro an rel mek a, LC member atan ZPM ticket-in mi 307 thlan tlin an ni.