Ruihhlo laka fihlim turin chah

Tuipuiral Group YMA chuan March 26-28, 2025 chhung khan Farkawn Joint YMA Hall-ah Inkhawmpui vawi 46-na an hmang a; March 27, Ningani zan khan minister of state Prof. Lalnilawma'n hmanpuiin, YMA member-te chu ruihhlo lak fihlim turin a chah.

Prof. Lalnilawma chuan, YMA thil tum pathumte chîk zawka ngaihtuah a, tihlawhtlingtu ni ṭheuh turin YMA member-te a sawm a, "YMA thil tum pathumte hi Zofate hmasawnnna ngaihtuahna kawng a ni a, Mizo mipa suat mektu ruihhlo laka fihlim te, tuihna humhalh te, zirna lama ṭan lak leh mahni intodelh tumnate chu YMA Kumpuan thupui–‘Ram leh hnam humhalh’ nen pawh a inhmeh hle," a ti a, an awmna hmun apiangah Mizo palai an ni tih in hre thar a, zo nun ze mawi chawinung zel turin a chah a ni.

Sorkar ruahmanna tharah a department chan pahnih–Rural Development leh Local Administration department-te an inchhunfin dawn thu sawiin Minister chuan, "Rural Development & Administration department kaltlang hian khawtlang hmasawnna thlen ka duh," a ti a; khawtlang hruaitu, tlawmngai pawl leh farmer society-te chu ram intodelhna kawngah thawhpui turin a sawm.

He hun hi Tuipuiral Group YMA vice president Lallawmawma'n a kaihruai a; khualzahawm H Duhkima, PHE engineer-in-chief pawhin thu sawiin, nungcha, ramngaw leh tuihna chereu mek zel venghim tur leh zo nun ze mawi chawi nung zel turin kalkhawmte a ngen a ni.