Nausen 77.6% hnenah hri danna pek a ni tawh

Lunglei District Task Force on Immunisation (DTFI) chu an chairman Navneet Mann, district bawrhsap hoin nimin khan an ṭhukhawm a; April 2024–February 2025 chhungin Lunglei district-a nausen 2,147 (target) zinga 1,665 (77.6%)-in hri danna an la tih tarlan a ni.

Ṭhukhawmah hian Lunglei district-a kum 2024-2025 chhunga naupang leh raipuarte hnena natna hri leng inkai chhawn theih laka invenna (vaccine) pek dan dinhmun thlirho niin, kalpui chhunzawm zel dan turte an sawiho a; April 2024–February 2025 chhungin Lunglei district-a nausen 2,147 (target) zinga 1,665 (77.6%)-in hri danna an la tih tarlan niin, March 2025 report a la tel loh avangin hri danna pek zat hi la pung chho tura beisei a nih thu an sawi.

Lunglei district-a mihring awm zat leh hriselna kaihhnawiha an dinhmun (data) dik leh rintlak a awm theih nana Health & Family Welfare department, Lunglei district-in digital population counting system an ruahman chu thlirho nghal a ni a; tun dinhmunah Lunglei leh Hnahthial district-a khaw 102 aṭangin data lakkhawm mek niin, mipa 53,052 leh hmeichhia 54,213, an vaiin mi 1,07,265 thun luh tawh an ni.