KHAWTHLIR

Thisen pe

March 29, Inrinni khan ṬKP, Bawngkawn Pastor Bial chuan Zoram Medical College & Hospital tan thisen unit 106 an pe a, petute mipa 86 leh hmeichhia 20 an ni. YMA, Bethlehem Vengthlang Branch-in Synod Hospital tan unit 78 an pe a, petute mipa 68 leh hmeichhia 10 an ni a; KṬP, Serchhip Dinthar Branch member mipa pariat leh hmeichhia parukte'n Serchhip District Hospital tan thisen unit 14 an pe bawk.

Kuhva rah man

Assam Rifles sipaite chuan March 29, Inrinni khan Champhai Tlangsam leh Zote péngṭhuam bul ramhnuaiah Myanmar lam aṭanga dan loa kuhva rah lak luh ip 321 an hmu chhuak a; Champhaia Customs Preventive Force hnenah an hlan.

YMA-in ruihhlo man

Central YMA hnuaia ruihhlo dotu, Central Anti Drug Squad (CADS) chuan March 22-28, 2025 chhung khan ruihhlo - heroin, damdawi leh zu eng emaw zat an man a, chumi kaihhnawihah chuan mi 44 an man. Central YMA General Secretary tarlan danin, CADS-in chawlhkar khat chhunga mi 44 an man zinga pahnih chu home-ah dah an ni a; mi 24 chu counselling neihpui an ni bawk.

Hnathawh enfiah

Siaha bialtu MLA Dr K Beichhua chuan March 29, Inrinni khan a bial chhunga hmasawnna hnathawh - Eklavya Model Residential School, Noaotlah khuaa sak mek leh, Lobo aṭanga Tluangram-Hakha kawng sial hna thawh mekte a hmunah a tlawh a, hna thawh dan a en. MLA hi bialtu MDC N Lalrosanga'n a ṭawiawm a ni.

Sports Complex

Sports minister Lalnghinglova Hmar chuan March 29, Inrinni zan khan a bial chhung Tuikual South-ah ‘Ralliana & Rokunga - YMA Sports Complex’ a hawng. Minister chuan, Sports Complex chu naupang zawkte chher nan ṭangkai taka hmang tur te, uluk taka enkawl tur leh zu leh ruihhlo tihna hmuna a chan loh tura vil zui turin Tuikual South khawtlang hruaitute a chah. Sports Complex siamna tura ram petu Ralliana chhungte leh Rokunga te thil tih chu chhuanawm a tih thu a sawi bawk.