Hmai tuama mi kutthlaktu man kim

Kulikawn Police-te chuan hmai tuama YMA, Kulikawn Vengthlang Branch member pakhat March 23, 2025 chawhma dar 11 vela kutthlaktute an man kim tawh.

Thu dawn danin, hmai tuama Kulikawn Vengthlang mi kutthlaktute chu - Robert R Lalduhsaka (21) s/o R Lalzidinga, Mission Vengthlang; Lalremsiama Kawlni (21) s/o Lalnunsanga, Mission Veng; Lalrinmawia (20) s/o Lalthuliana, Bethlehem Vengthlang; Vanlalpekhlua (21) s/o P Laikunga, Tlangnuam Vengthar leh, Emanuel Lalliansanga c/o G Thanga, Tlangnuam te an ni.

YMA, Kulikawn Vengthlang Branch chuan thuchhuah siamin, "Heng misualte man kim an nih theih nana Central YMA OB leh CEC mai bakah, branch hrang hrangin min ṭawiawmna leh kan branch thlavang in hauhnaah lawmthu kan sawi tak meuh meuh," an ti.

Tarlan tawh angin, CYMA-in March 22, 2025-a Aizawl khawpui chhunga branch YMA-te tana 'Ruihhlo do hnatlang' an buatsaih ṭumin, Kulikawn Vengthlang Branch YMA member pakhat chu ruihhlo zuar hêka mantirtua puh vangin March 23 chawhma dar 11 velah hmai tuam rualin a in aṭanga ko chhuakin kut an thlak rawn a ni.