Tetea Hmar-in Champhai a tlawh

Minister of state Lalnghinglova Hmar chuan March 29, Inrinni khan Champhaia Vanlallawma Indoor Stadium (VANIS) leh Keilungliah tuikhuah a tlawh a; Excise & Narcotics department-a thawkte a kâwm bawk.

Lalnghinglova Hmar chuan, VANIS-ah Champhai khawpuiin Mizoram Super League a thlen ṭuma basketball backboard chhia chu a rang lama thlak tum a nih thu a sawi.

Keilungliah a tlawhnaah Lalnghinglova chuan, Keilungliah tuikhuah chu khualzinmite hîp theihna tura hmun ṭha leh khawtual mite tan pawh eizawnna tling siam thei nia a hriat thu a sawi a, "He hmun chei tura hmalakna thui tak kalpui tawh a ni a, hna ṭan theih hun pawh a hla lutuk tawh lo turah ka beisei," a ti.

Minister hi Champhai END hotute nen an inkawm a, Champhai END mamawh leh hmalak dan turte an sawiho a ni.