Pawl ṭhenkhatin kharkhipna chungchangah Kalphung thlak danglam deuh an duh

Sumdawng pawl intélkhawm Mizoram Merchant Association (MIMA) president PC Laldinthara leh Mizoram Mistiri Association (MMA) President chuan, khàrkhipna kalpui mek pawhsei a nih dawn chuan kalphung thlak deuh ni se an duh. Aizawl Two Wheeler Taxi Association (ATWTA) President chuan pawhsei an huam loh thu a sawi a; Mizoram Taxi Association (MTA) General Secretary chuan, taxi driver-te'n an member harsate sorkarin ṭanpui thei se an duh thu a sawi bawk.

Vanglaini palai zawhna chhangin PC Laldinthara chuan, lockdown pawhsei a nih chuan dawrkai tam takin an tawrh tur thu a sawi a; dawrkai zinga 80% chu ni tina an thil hralh chhuah hmanga khawsa an nih thu sawiin, "Lockdown pawhsei a nih a, dawr khâr vek tur a nih chuan harsatna tâwk tam tak an awm ang.

Dawr luah man leh thawktute hlawh pek reng a ngai dawn a, pe thei lote pawh an awm thuaiin a rinawm. Lockdown pawtsei tawh loin, ramri uluk taka ven ni se tihte ngaihtuahnaah a awm," a ti. MIMA President chuan, hun rei tak dâwr zawng zawng khâr vek chu ṭha a tih loh thu sawiin, "Sorkarin ruahmanna fel tak siam se, inkhâr reng vek loin hawn hun bituk se, item azirte pawhin hawn hun bituk thei se a duhawm hle," a ti a; ruahmanna siam loa dawr khar vek tur a nih leh dawn chuan lockdown pawhsei chu dawrkai tan a huphurhawm thu a sawi. Mizoram Mistiri Association (MMA) president CD Lalthlamuana chuan Vanglaini palai zawhna chhangin, lockdown kalphung thlak a nih loh chuan mistiri leh an helper-te tan lockdown pawhsei a zuamawm tawh loh niin a sawi.

CD Lalthlamuana chuan, kan ram himna atan lockdown pawhsei ṭha a tih thu a sawi rualin, "Sorkar hian ruahmanna fel tak inhlawhfate tan siam se kan ti hle. Mi 20-30 inhlawh luih luih chu a ṭha hauh lo. Mi pahnih pathum khawi lai emawa inhlawhte chu phal ni se. Local task force-te hriatpuinain inhlawhfate inhlawh theih dan tur sorkarin ruahman se kan duh hle," a ti. MMA President sawi danin, an pawlah mi 3,000 vel an awm a, mi 30 chuangin harsatna an tawh thu pawlah an thlen tawh. Mi pahnih ṭanpuina an pe tawh a, mi dang pawh an chanchin an zir chian hnuah ṭanpuina pek an tum. Mistiri-te aia hlawh tlem zawk helper-te'n lockdown an tuar lehzual.

ATWTA president Lalhmunmawia chuan, Covid-19 chu an hlauh loh vang ni loin memberte dinhmun thlirin lockdown pawhsei loh ni se an duh thu a sawi a, "Kan member zingah harsatna tâwk an awm zeuh zeuh a, pawlin ṭanpuina kan pe ṭhin. Two wheeler taxi khalhtu tam ber hi ni tina hlawh inpe an ni. Lockdown hi pawtsei lo mah se, kan vaiin kan service nghal ṭhup ka ring lo," a ti. Vanglaini palai zawhna chhangin ATA general secretary Lalzawmliana chuan, lockdown vanga an member harsatna tâwkte chu an theih ang anga an puih thu a sawi a, "Sorkarin lockdown a pawhsei chuan kan zâwm mai tur a ni. Harsatna tâwk erawh kan awm belh dawn a, pawl sumin a puih reng theih loh hun a awm ang," a ti a; lockdown pawhsei a nih chuan sorkar aṭangin ṭanpuina awm thei se an duh thu a sawi.