Serchhip District Beautification Project kalpui ṭanna hun CM hoin hman a ni

Chief minister Lalduhoma chuan March 29, Inrinni khan a bial, Serchhip district-in District Beautification Competition-a lawmman pathumna an dawn a taka kalpui ṭanna 'Launching of Serchhip District Beautification Project' a hmanpui a; Serchhip khawpui cheina leh tihhmasawnna atan MLA fund aṭangin public water drinking point siamna tur Rs 5,00,000 a pe.

CM Lalduhoma chuan, District Beautification Competition kaltlanga Serchhip DC leh a thawhpuite thawhrim rah Rs 50,00,000 lawmman dawn a ni chu lawmawm a tih thu a sawi a, "Mi dang chenna tur khawpui din pawh kan ni lo a, keimahni leh kan tu leh fate la chen zelna tur khua kan din chho mek a ni. Khawpui mawi leh nuam a nih theihna tura hmalak kha kan tih ngei ngei tur thil a ni," a ti a; khawpui mawi din tura theihtawp chhuah turin Serchhip mipui a sáwm.

Inkhawm hi Serchhip additional DC Lalrinzuala'n a kaihruai a; bawrhsap Paul L Khuma'n thu a sawi bakah, SDC Dr Marilyn Lalruatkimi'n intihsiaknaa an project tlangpui a sawifiah.

Dr Marilyn Lalruatkimi sawi danin, Serchhip khawpui chei mawina tura tih tur lian tham deuhte chu - park siam, kawng sirah mumal taka túm thing (palm tree) phun, bazar lûn lai thawm ṭhat, ṭhutthleng sei (bench), wall painting, fountain leh signage mawi tak tak dah, ATM water vending machine (public water doint) dah, bypass area-a truck bay siam, mumal taka zebra crossing siam, mipui rilrua khaw chhung faina leh mawina tura mawhphurhna tuh (community participation)-te a ni.