Aizawlah Faina hnatlangpui neih a ni; Damdawi-in bawlhhlawh sâwngbâwlna April 1-ah hman ṭan a ni dawn - Sapdanga

Urban Development & Poverty Alleviation department, Aizawl Municipal Corporation leh Central YMA bultumin nimin khan Aizawla veng hrang hrangah faina hnatlangpui neih a ni. Hnatlangpui hi UDPA minister K Sapdanga'n a hawng a; Tuiriala Common Bio Medical Waste Treatment Facility chu vawiin April 1, 2025 hian hman ṭan a nih dawn thu a sawi.

Faina Hnatlangpuiah hian Aizawla veng hrang hrangah local council leh YMA branch ruahman angin veng chhung tihfai hnatlang neih a ni a; Hnatlangpui huaihawttute'n tifaitu bik tura an ruatte'n Aizawla hmun 18 an tifai a, hmun pahnihah rawng hnawih a ni bawk.

Hnatlangpui hawnnaah hian UDPA Minister leh sorkar official-te'n CYMA hnenah bawlhhlawh báwm 300 an hlan a; CYMA chuan Aizawla YMA branch hrang hrang hnenah a pe chhawng ve leh ang. Nimin vek khan Aizawla YMA branch-te faina lama kumtluana an inelna tur ṭan a ni.

UDPA Minister chuan, damdawi-in bawlhhlawh bik sâwngbawlna atan Tuirialah Aizawl Smart City Ltd-in 'Common Medical Waste Treatment Facility' a siam thu sawiin, "April 1, 2025 aṭang hian a takin hna a thawk ṭan tawh dawn. Mizorama la awm ngai lo a ni a, Bio Medical Waste Rules 2016-in a phût ang ngeia damdawi leh a kaihhnawih bawlhhlawh kan sâwngbâwl thei tur hi a phûrawm hle," a ti.

UDPA department, AMC leh CYMA ten thawhhona ṭha tak neia faina hnatlangpui an buatsaih chu thil chhinchhiah tlak a nih thu sawiin Sapdanga chuan, "Aizawl khawpui faina leh thianghlimna atana ṭhahnemngai leh inlungrual taka kan thawhho zel ka beisei a, tun hi bul ṭanna chauh a ni," a ti a; faina leh thianghlimna chuan hriselna a nghawng thu a sawi.

K Sapdanga chuan, nimina ṭan tak YMA branch-te faina lama an intihsiakna tur chu phûrawm a tih thu a sawi a; nakkum lamah lawmman la thei khawpa ṭan la ṭheuh turin YMA branch-te a chah.

Aizawl faina atan Mizoram sorkarin hmalakna leh hma­chhawp hrang hrang a nei tih sawiin Sapdanga chuan, "July 4, 2024 khan UDPA, AMC leh Aizawl Smart City-te'n Comprehensive Plan for Municipal Waste Ma­n­a­ge­ment in Aizawl pawmin hming kan sign hnan. Plan-ah hian Aizawl khawpui faina tura rua­hmanna leh hmachhawp hrang hrang tarlan a ni a, ruahmannate tihlawhtling turin UDPA Secretary kaihhruai Monitoring Committee siam a ni," a ti.

UDPA Minister chuan, Construction & Demolition Waste Management Rules 2016-in a phût angin in ṭhiahna leh sakna bawlhhlawh bik thehthangna leh sâwngbâwlna tur hmun Hualngohmun ramah siam mek a nih thu leh peih ṭêp tawh a nih thu a sawi bawk.

Aizawl deputy mayor R Thanglura chuan, Aizawlah ni tin pick-up truck 70 leh 407 truck 80-in bawlhhlawh an paih ṭhin thu a sawi a; UDPA secretary Lalmalsawma Pachuau-in Faina Hnatlangpui buatsaih dan a sawi.

CYMA president Lalhmachhuana pawhin thu sawiin, 'Kan fai thei a ni' tih chu YMA-te'n rilruah an neih thu leh YMA branch hrang hrangin faina hnatlang an nei tawh ṭhin thu a sawi a, "Thingtlang aiin khawpui kan bâl zawk tih hi a chiang a, khawpuiah mihring changkang zawk awmna ni àwm tak hi kan la ṭawp tlat a, ṭan kan lak a ngai. Hmasawn zel turin, faina nunpui turin, faina daih rei nei turin ṭan i la ang u," a ti.