Champhai Police-in March chhungin ruihhlo cheng nuai 553 hû an man

Champhai district police-te chuan March 2025 thla (ni 27 thleng) chhung khan ruihhlo chi hrang hrang cheng nuai 553 hû an man.

Tun hnaia Champhai District Level Narco Coordination Centre Committee member-te an chairman Mohammad Aaquib, bawrhsap hoa ṭhutkhawma tarlan danin, March 2025 chhung hian Champhai district police-te'n heroin kg. 7.45, methamphetamine kg. 22.105 leh caffeine kg. 3,000 an man a, a vaiin cheng nuai 553 hûa chhût a ni.

March 2025 chhung vek hian Champhai district police-te chuan ruihhlo kaihhnawihah mi 22 an man a; Narcotic Drugs and Psychotropic Substances Act, 1985 tlawhchhanin thubuai 15 an ziak lut.

Champhai Bawrhsap chuan, ruihhlo donaah sorkar thuneitute leh tlawmngai pawlte inkara thawhhona ṭha tak a awm ṭhin chu chhunzawm zel a ṭul thu a sawi.

Champhai SP Shivendu Bhushan chuan, NCORD member-te chu ruihhlo donaah theihtawp chhuah a, awmze nei zawk leh mumal zawka khuahkhirh a nih theih nan ngaihtuahna seng zel turin a chah a ni.