KHAWTHLIR

2025-ah ASF vangin vawk 628 thi tawh

AH&Vety department chhinchhiah danin, kuminah African Swine Fever (ASF) kaihhnawihah vawk 628 a thi tawh a, ASF vanga thi 521 leh suat 107 a ni. Kumin hian Mamit leh Lawngtlai district-a khaw/veng 13-ah ASF a léng tawh a, a la léng mek zel. Nimin khan Lawngtlai district-ah vawk pariat leh Mamit district-ah vawk pali a thi a; Zawlnuam, Mamit district-ah nimin khan vawk 12 tihhlum a ni.

Chapchar Kût

Pune Mizo Welfare Association chuan nimin khan Bible Centre, Salisbury Park-ah Chapchar Kût an hmang a, MLA Jeje Lalpekhlua'n a hmanpui. Chapchar Kût thupui chu Mizoram ang thoin 'Zo nun ze mawi - hawihawmna' tih a ni.

Ṭanpuina hlan

March 26, 2025-a in pakua kanna hmun Diltlang South, Lawngtlai district chu nimin khan LADC Officers Association hruaitute'n an tlawh a, kângmei tuarte ṭanpuina atan pawisa an thawh khawm Rs 55,000 an hlan. Tarlan tawh angin, Diltlang South-ah hian Assam type in pakua chu bungruah chuh hman lohin a kâng ral a, chhungkaw 17 luah lai a ni.

END-in heroin man

Excise & Narcotics department chuan March 29, 2025 zan dar 10:45 khan Rengtekawnah maxicab pakhat aṭangin heroin (no. 4) gram 229.97 an man a, lirtheia chuang mi pahnih - Lalrinchhunga (22) leh Lalzahawma (30), Kolasib Tuiṭha Veng ve ve an man nghal bawk. Heroin vanga man mi pahnih hi March 29, 2025 khan Kolasib District Court-ah hruai an ni a, March 30 khan Kolasib District Jail-ah dah luh an ni.

Ṭhalai inkhawmpui

Wesleyan Methodist Church of Mizoram hnuaia ṭhalai pawl, Mizoram Wesleyan Methodist Youth Fellowship chuan March 28-30, 2025 chhung khan Kolasib Diakkawn YMA Hall-ah inkhawmpui vawi 18-na an hmang. Wesleyan Methodist Youth Fellowship hi Mizorama district pali-ah bial pali a awm a; inkhawmpuiah hian palai 400 chuang an tel a, thupui chu 'In êng chu mi mithmuhin êng rawh se' tih a ni.