Mosolman-te ram tan an ṭawngṭai

Nimin kha Muslim ho thla thianghlim Ramadan tàwpna, Id-Ul-Fitr a ni. Id-Ul-Fitr-ah hian Mizoram hmun hrang hranga Mosolman-te chu nimin zing khan an ṭawngṭai a, Aizawlah chuan Joint YMA Field, Vaivakawnah an ṭawngṭai.

Mosolman-te hi khawvel pumpui, India ram leh Mizoramah remna leh muanna a awm theih nan te, hnam leh sakhaw hrang hrang zuitute inngeih taka an chenho theih nante an ṭawngṭai a ni.

Id-Ul-Fitr pual hian Aizawl Mosque Committee & Muslim Welfare Society, Mizoram general secretary Mamon Majumdar chuan thuchhuah a siam a; Mizorama Mosolman awmte chu inner line permit (ILP) ngai pawimawh tura chahin, "Mizorama kan awm chuan ILP nung kan neih ngei a ngai a, ILP neih loh vanga police-te man ngaia awm hi a zahthlak. ILP nung ngei nei turin kan ngen che u a, kan lehkhabu thianghlim Quran-in a sawi angin dan kan zâwm tur a ni," a ti.

Aizawl Mosque Committee & Muslim Welfare Society, Mizoram Secretary chuan Mizoram hmun hrang hranga Mosolman-te chu khawtlang inenkawlna leh YMA thuchhuakte zâwm a, an awmna huam chhung khawtlangin hnatlang a kohahte tel ṭhin turin an chah.

Mamon Majumdar chuan, Mizoram mipuiiin an mi leh sate an dawnsawn dan leh hna thawh tur hrang hrang an siamsak ṭhinahte an lawm thu a sawi a; Id-Ul-Fitr an hmanna tura puitu khawtlang hruaitute leh police-te chungah an lawm thu a tarlang bawk.