HM-in CYMA Zawlbuk a tlawh

Home minister K Sapdanga chuan nimin khan Central YMA office-a YMA Zawlbuk a tlawh a, CYMA president Lalhmachhuana hoin hruaitute'n an lo dawngsawng.

Home Minister chuan, ruihhlo leh sual donaah thawhhona ṭha neih a ṭul thu sawiin, "Tih tak zeta thâ thlah loa hmalak zel a ṭul. Ruihhlo do kawngah YMA-te thawhpuiah ka sáwm tak meuh meuh a che u," a ti a; tlang hrang hranga YMA branch-te hmalakna a thlàwp tlat thu a sawi.

CYMA hruaitute tarlan danin, March 15, 2025 aṭangin Central Anti Drugs Squad (CADS) kalpui leh ṭan a ni a; CADS din thar leh hnuah heroin hawng 30, codeine bûr 2,000 chuang leh ruihhlo dang eng emaw zat an man tawh. Ruihhlo kaihhnawihah mi 80 chuang thuneitute leh home-ah an dah tawh bawk.