Lunglei district-ah PwD 1,262 an awm

Lunglei District Level Committee on Disability chu an chairman Navneet Mann, bawrhsap kaihhruaiin tunhnai khan DC conference hall-ah an ṭhukhawm a; Lunglei district-ah Person with Disabilities (PwD)/vohbik mi 1,262 an awm tih tarlan a ni.

Ṭhutkhawmah hian January-March, 2025 chhunga Lunglei district-a vohbik (PwD)-te dinhmun zirchianna report thlirho niin, vohbikte tana hmalak zel dan tur leh an tana hamṭhatna leh ṭanpuina awm theite sawiho a ni a; District Social Welfare Office nen ṭangkawpa vohbikte chawikanna tura hmalakna - Project LEAP (Lunglei’s Empowerment for Access and Equity for all Persons) kalpui tur chungchang an sawiho bawk.

Tarlan danin, Lunglei district-ah vohbik mi 1,262 an awm a, an zinga mi 443 chuan Disability Certificate/Unique Disability ID (UDID) neiin, certificate nei lo mi 819 an awm. Disability Certificate/UDID nei zinga a tam zawk (mi 293) chu Lunglei Municipal Council chhunga chengte an ni a, UDID nei dang mi 150-te chu LMC pawn lam RD Block pali - Lunglei, Bunghmun, Lungsen leh Tlabung RD block chhunga cheng an ni.

Vohbikte'n Disability Certificate/UDID an neih mumal loh avanga ṭanpuina dawn kawnga harsatna an tawh ṭhin thu tarlan a ni a; committee chuan UDID la nei lote chu a ṭul anga assessment camp buatsaihsak te, vohbikte office leh mipui punkhawmna hmuna awlsam zawka an veivah theih nana ruahmanna awm dan endikna (accessibility audit) kalpui leh vohbikte tana hamṭhatna awm theite zawn chhuah a, hmalaksakte an rel.