Olympic khel thei khawpin sorkarin Mizo naupangte buatsaih a tum - CM

2nd April, 2025

Chief minister Lalduhoma chuan nimin khan East Lungdar Mini Sports Complex-ah Tuichangral Championship 2025 a hawng a; Olympic 2036-a India aiawh thei khawpin ZPM party kaihhruai sorkarin Mizo naupangte buatsaih an tum thu a sawi.

CM Lalduhoma chuan, infiamna tam tak chu eizawnna tlak a nih tawh thu leh bei tak takte tan hlawhtlin theihna leh ram leh hnam chawimawi theihna a nih thu a sawi a, "Kan sorkar hian kan naupang thiamna (talent) nei ṭhate zawn chhuah a, training ṭha tak pek a, Olympic 2036-a India aiawh thei khawpa buatsaih kan tum a, Tuichangral Championship pawh hi naupang talent zawn nan kan hmang dawn," a ti.

Ruihhlo vangin Mizo ṭhalai tam tak an thih thu sawiin Lalduhoma chuan, "Tuichangral ṭhalaite nun kawng dik lo lakah lo fihlim u la, zûk leh hmuam leh ruihhlo tih ai chuan infiamna lamah in hun àwlte lo hmang zawk u la, in rilru leh taksa tan a ṭhat bakah ram tan pawh a ṭha. Infiamna hian chak zawk nih dan leh chak lo zawk nih dan pawh min zirtir a, chu chu kan ni tin nuna thil thleng ṭhin, kan dawnsawn thiam ngai tak a ni," a ti a; Tuichangral infiammite zingah infiamnaa hlawhtling tak tak an awm tawh thu a sawi.

Sports & Youth Services minister Lalnghinglova Hmar pawhin thu sawiin, "Tuichangral ṭhalaite tana entawn tur, kum li chhunga East Lungdar aṭanga Barcelona Olympic-a India aiawha inlan phak Mizo olympian hmasa ber C Lalremsanga neitu in ni a, he bialah hian talent a awm tih kan hria a, kan rawn zawng zel a ni," a ti.

Sports Minister chuan, Championship buaipuitute'n Mizoram sorkar an sâwm lut ni loin, sorkarin tel ve a dil zawk tih sawiin, "Naupang talent nei ṭhate kan rawn zawng a, nakkumah pawh kan la rawn zawng leh ang," a ti a; Tuichangral Championship-ah tawp mai lo a, Olympic khel thei nih tum turin infiammite a chah.

Tuichangral Cham-pionship hawnnaa tarlan danin, Tuichangral Games & Sports Association huam chhungah khua 33 a awm a, kumina Championship-ah hian khaw 17 aṭangin infiammite an tel a, infiamna chi 15-ah an intihsiak dawn a ni.