FOCUS Design Mission-in bul an ṭan

Agriculture & Farmers' Welfare Department buatsaihin nimin khan Aijal Club-ah FOCUS 2.0 Design Mission hmalakna tur bul ṭanna hun hman a ni a, Agriculture minister PC Vanlalruata'n a hmanpui.

Tlangzarhna inkhawm hi Agriculture & Farmers' Welfare secretary Ramdinliani'n a kaihruai a; minister PC Vanlalruata chuan, FOCUS 2.0 Design Mission team member-te hnenah a ngaih pawimawh hrang hrang sawiin, Mizoramah agriculture-in hma a sawn theih nan lo/huan panna kawng ṭha a pawimawh hmasak avangin kalkawng ṭha an neih theih nan hmalakpuiah a sáwm.

PC Vanlalruata chuan, Mizoram sorkarin Zau Policy a kalpui mek tih sawiin, FOCUS 2.0-ah pawh Zau Policy zûlzuiin cluster-based approach anga hmalak ni thei se a duh thu a sawi a; loneitute thar chhuah a tam lehzual theih nan a theih chin chinah inter-cropping kalpui ni se a duh thu a sawi bawk.

International Fund for Agricultural Development (IFAD) aṭanga FOCUS Design Mission team hi April 18, 2025 thleng Mizoramah an chám dawn a, an chàm chhungin district hrang hrang tlawhin, sorkar official-te an kâwm dawn a ni.