World Art Day 2025 hmanna Mizoramah nghah a ni dawn

April 15, 2025 khian khawvel hmun hrang hrangah UNESCO World Art Day hman a ni dawn a; India ramah pawh hman tur niin, Association Internationale des Arts Plastiques/International Association of Art (AIAP/IAA) ruahman angin ram pum huapa hmanna chu Mizoramin a thleng dawn.

Mizoramin India rama UNESCO World Art Day hmanna a thlen tur chungchangah nimin khan Art & Culture minister C Lalsawivunga hoin a pisaah sorkar hotute'n inbuatsaihna leh hmalak dan turte an sawiho. World Art Day lawmna atan hian IAA chuan department pali - Art & Culture, Tourism, Information & Public Relations, Printing & Stationery leh Commerce & Industries department-te thawhpuiah an sáwm a ni.

C Lalsawivunga chuan, "He hun hi Mizoram leh Mizote chanchin khawvel huapa pho lanna hun remchang a ni dawn a, kan culture hi hmun hrang hrangah kan pho lan a ṭul. Nikuma Turkey rama cheraw kân tura kan hruaite an hlutzia ka hmuh khan mi dangin kan culture an hriat châkzia ka hmu," a ti a, Mizo hnam nunphung, lâm leh zaite chawi lâr zel a ṭul thu a sawi.