KHAWTHLIR

Sawhthing sawiho

Khawzawl District Agricultural Marketing Committee chu an chiarman K Vanlalṭhiana, bawrhsap kaihhruaiin nimin khan an ṭhukhawm a; Khawzawl district aṭanga rang leh awlsam zawka sawhthing hralh dan tur te, sawhthing hralh a awlsam theihna tura a phurhna leh a lei turte nena indawrnaa hmasawn dan turte an sawiho a ni.

SCC enkawltute tan training buatsaih

Serchhip district-a Bána Kaih scheme hnuaia sawhthing hralhna, secondary collection centre (SCC) pasarih enkawltute tan nimin khan Serchhip District Agricultural Marketing Committee-in training an buatsaih a, bawrhsap Paul L Khuma'n a hmanpui. MAMB co-opted member pahnih - Lalnunpuia leh Isak Lalremruata ten thil pawimawhte an zirtir a; Bána Kaih kaltlanga sawhthing hralh thawh hnihna kalpui ṭan a nih dawn thu leh a thawh hnihnaah hian SCC tinte chu mahni kea ding thei tura beisei an nih dawn thu tarlan a ni.

Heroin man

Assam Rifles sipaite leh Excise & Narcotics department mite chuan March 30, 2025 khan Champhai Zote péngah heroin (no. 4) hawng 5 an man a; Champhaia Excise & Narcotics department-in thubuai an ziak lut.

Minister ngen

Lai Women Association Gen. Hqrs hruaitute chuan nimin khan Health & Family Welfare minister Lalrinpuii a pisaah an hmu a, Lawngtlai District Hospital-a doctor leh thawktu dang indaih lohna thlenin, chinfelsak turin an ngen.

Khawzawlah sawiho

Nimin khan Khawzawl DC K Vanlalṭhiana hoin DC meeting hall-ah naupang tana Sap ṭawng inzirtirna tur Basic English Training Programme hman theih dan tur sawiho a ni. He programme hi English Language Fluency (ELF) tihin Disha Foundation, Chennai nena ṭangkawpin Aizawla sorkar sikulah ṭha taka lo kalpui tawh a ni a, Khawzawla sorkar primary leh middle school-a hman ve dan tur an rel. Khawzawl DC chuan zirlaite tana hmalakna ṭha tak a nih ngei a rin thu a sawi.