Bihar, Rajasthan leh Odisha din champha Raj Bhavan-ah lawm a ni

Governor Gen. Dr Vijay Kumar Singh chuan nimin khan Raj Bhavan-ah Bihar, Rajasthan leh Odisha-te state puitlinga hlankai ni 'Foundation Day' lawmna a buatsaih a; Mizoram University, NIT Mizoram leh J Thankima College zirlaite'n zai, lemchan leh hnam lâmte an entir.

Gen. VK Singh chuan, India rama state-te state nih champha state danga lawmna programme - Ek Bharat Shreshtha Bharat chu India rama hnam ze hrang hrangte chawimawina leh zahawmna vawnhimsakna a nih thu a sawi a, "He hmalakna hian khua leh tuite inkarah inpawhtawnna leh inhriatthiamtawnna tih chak deuh deuh a tum a ni," a ti.

Larsap chuam, "India rama state tin hian chanchin hran ṭheuh kan nei a, India hmarchhak hi hnam ziarâng leh nun dan phung hausa tak nei a ni a, hnam ziarâng leh nunphungte kan inhriatpawh tawn hian India ram inpawh leh nghet kan siam thei a ni," a ti a; Ek Bharat Shreshtha Bharat chu ram chak leh inpumkhat siamna atana pawimawh a nih thu a sawi.

Raj Bhavan-a state pathum foundation day lawmnaah hian Odisha Governor Dr Hari Babu Kambhampati leh Bihar Governor Arif Mohammed Khan te thuchah bakah, state pathumte chanchin tarlanna video tawi thlirho a ni. MZU aṭangin assistant professor Dr Akhilesh Kumar Sharma leh Prof. Rabindra Kumar Mohanty ten Rajasthan leh Odisha state chanchin an sawi bawk.

Sorkar thuchhuah tarlan danin, March 22, 1912 khan Bengal Presidency aṭangin Bihar a piang a; Rajasthan chu March 30, 1949-ah Jodhpur, Jaipur, Bikaner leh Jaisalmer lal ramte inzawm khawm hmanga din a ni. Bihar hnuaia awm ṭhin Odisha (a hming hmasa Orissa) chu April 1, 1936-ah state puitlingah hlankai a ni.

Ek Bharat Shreshtha Bharat hmang hian India rama state leh union territory hrang hrangte din champha (foundation day) state dangte'n an lawm ṭhin a; Mizoramah chuan June 2023 khan Raj Bhavan-ah Governor kaihhruaiin lawm ṭhin niin, state leh UT eng emaw zat din champha lawm a ni tawh.