Inkhârkhip pawhsei sawiho dawn Health Minister-in pawhsei ṭul a ti

Health minister Dr R Lalthangliana chuan, Covid-19 léng vanga inkhârkhip kalpui mek April 14, Thawhlehnia tàwp tur chu pawhsei ṭul a tih thu a sawi. Inkharkhip pawhsei chungchang hi vawiinah Chief Minister kaihhruaiin sawiho a ni ang.

Inkharkhip pawhsei chungc hanga a ngaihdan Vanglaini palaiin a zawh na chhangin Dr R Lalthangliana chuan, "Inkharkhip pawhsei a ṭul. Tuna dinhmun ṭha viaua kan inngaih lai hian, zan khat thil thuah kan chhe vek thei. Inkharkhip kan hlih thut chuan mi tam tak an awm thiam lo ang a, chu chu a hlauhawm a ni," a ti.

Health Minister chuan, inkharkhip pawhsei a nih dawn pawhin a kalphung erawh thlak danglam deuh a ṭul mai theih thu sawiin, "Tuna kan kalpui dan lo deuha kalpui a ngaihna laite pawh a awm thei a, sawiho tur a ni. Tunlai hi thlai chi thlâk hun lai a ni a, chu'ngte chu ngaihtuah a ṭul," a ti a, ramri erawh chu khauh leh zuala ven a ṭul thu a sawi.

R Lalthangliana chuan nimin khan Union Minister for Food Processing Industries leh Union Minister for Commerce & Industries te nen an inbiak thu sawiin, "An thusawi dan aṭangin industry lian pui pui ni lo, a tê tham deuhte chu invenna kalpui chunga hna thawh theihtir an rilrûk a ang," a ti.

Inkhârkhip pawhsei chungchang hi vawiin zing lam hian Council of Ministers-in an sawiho dawn a; chumi hnuah Assembly Annexe conference hall-ah Chief Minister hoin, Speaker, Health Minister, Home Minister, Supply Minister, IPR Minister, sorkar offi cialte bakah, Mizoram Kohhran Hruaitute Committee, NGO leh po litical party aiawhte'n an sawiho leh ang.

Tarlan tawh angin, prime minister Narendra Modi chuan Inrinni khan state hrang hrang chief ministerte inkharkhip chungchangah a ráwn a, April chhung inkharkhip an rawt hlawm. Tuna ram puma inkharkhip kal mek hi ni 21 chhung atana tih a ni a, April 14, naktukah a tawp dawn a ni.