Fûr huna inpuahchah dan tur sawiho

Lunglei District Disaster Management Authority (DDMA) chu nimin khan DC conference hall-ah an ṭhukhawm a, kumin fûr lo thleng tura chhiatna hrang hrang thleng thei laka himna tura inpuahchahnate an sawiho.

Ṭhutkhawmah hian Lunglei DDMA member te, sorkar department, Assam Rifles, BSF leh NHIDCL hotute an tel a; chhiatna thleng thei laka invenna tur leh a thlen palha rang zawka hmalak a nih theih nan zonal officer-te'n an huam chhunga chhiatna thlen ṭhinna hmunte enfiahin report lo siam se, an ti.

Hmun hrang hrangah tawm himna hmun (safe shelter) leh veivahna kawng (evacuation route) ruahman ni se, an ti a; office leh agency hrang hrangte'n chhanchhuah hna thawhna hmanrua an neih dan DC-ah hriattir se, office hrang hrangah nodal officer inruat ni se, chhiatna laka himna atana tih tur leh tih loh tur bakah, biak pawh tur number-te zau taka puanzar ni se, an ti bawk.

Lunglei DDMA chairman Navneet Mann, bawrhsap chuan, Mizoramah fûrah khuarel chhiatna - leimin, tuilian leh chumi vanga kawng pingte'n harsatna a thlen ṭhin bakah, thi leh in leh lo chhiatna a thlen ṭhin thu a sawi a, "Chhiatna thleng thei lakah inrálrin lâwk a ṭul," a ti a; hmasawnna hnathawhte fûr hmaa thawh zawh a nih theih nan leh chhiatna thleng thei laka himna turin work department-te leh NHIDCL-te chak taka hma la turin a chah.

Sorkar department hrang hrangte chu kawlphetha, tui, kawng, buhfai, ni tin mamawh, hriselna kaihhnawih leh thil dangah fûr laia harsatna a awm loh nan an hmazâwn ṭheuhah inpuahchah turin Bawrhsap chuan a chah a; fûr laia leimin, kawng chhia leh chhiatna chi dang a thlen thulhah DC office-a DEOC-ah report vat ṭhin turin district mipui a chah bawk.