Raltlante an awm dan tur hrilh

Bualpui (Ng) Village Council, YLA, Mizoram Police leh Assam Rifles te chuan March 31, Thawhṭanni khan Bualpui (Ng) huam chhunga raltlante an kâwm a, an awm dan tur an hrilh.

Inkawmnaah hian raltlante chu ram leh khawtlang a him zawk theihna tur leh mipui leh raltlante thawhhona a ṭhat zawk theihna tura pawimawhte sawi a ni.

Raltlante'n an zawm tur hrang hrang duan a ni a, khaw chhunga Kenbo bike leh lirthei dang kawlte chu khaw chhungah chauh hman phalsak an ni. An zin dawnin Joint VC Secretary hnenah inhriattir a, lehkha lak hmasak zel tura tih an ni a, an haw hunah lehkha kengin Joint VC Secretary hnenah inhriattir leh tur a ni bawk.

Bualpui (Ng) khaw chhunga in luah turte tan VC leh YLA hnenah inhriattir hmasak tur a ni a, puipunna an huaihawt duh a nih chuan Joint VC-ah an dil hmasak tur niin, mikhual an neih dawnin Joint VC hnenah inhriattir zel tur a ni.

Tun hnai khan Bualpui (Ng)-ah hian methamphetamine mûm 56,000 man a nih avang leh Myanmar aṭanga ruihhlo lak luhna kawngin a paltlang avangin raltlan leh anmahni behchhana dan bawhchhiatna a thlen loh nan raltlante koh khawm a ni.