Sorkarin Siaha district chhungah sawhthing kg. 1,13,062 a lei tawh

Mizoram sorkar thuchhuah chuan, Bána Kaih (Handholding) hnuaiah Siaha district-ah nimin thleng khan sorkarin sawhthing kg. 1,13,062 (quintal 1,130.62) a lei tawh a, kg. 79,624 (qtl 796.24) a hralh chhuak tawh tih a tarlang.

Sorkar thuchhuah tarlan danin, Siaha district-ah hian secondary collection centre (SCC) pahnih - Siaha (DC office complex) leh Tipa (BDO complex)-ah a awm a; society hrang hrangte'n primary collection centre aṭanga phur khawmin kg. khat Rs 50-in an hralh ṭhin. Sawhthing dahna atan ip (mesh bag) a thlawna sem a ni bawk.

Siaha district-ah hian nimin thleng khan sorkarin sawhthing kg. 1,13,062 (qtl 1,130.62) a lei tawh a; chu'ngte chu Siaha SCC-ah kg. 51,938 (qtl 519.38) leh Tipa SCC-ah kg. 61,124 (qtl 611.24) a ni.

Hetih lai hian, sawhthing lei tawh aṭangin kg. 79,624 (qtl 796.24) hralh a ni tawh thung a; Tipa SCC aṭangin kg. 34,119 (qtl 341.19) hralh a ni a, Siaha SCC aṭangin kg. 45,505 (qtl 455.05) hralh a ni bawk.