KHAWTHLIR

Naktuk, April 14 hi Dr BR Ambedkar pian champha a ni a, Mizoram sorkar chuan holiday-ah a puang. Sorkar pisa, sorkar enkawl hnathawhna hmun, zirna-inte leh bank-te khâr a ni ang. 

Naktuk April 14 zing dar 9 aṭanga tlai dar 5 inkarah Keiṭum leh Khawlailung inkara Tuichâng lei chhuat siamṭhat a nih dawn avangin Tuichang lei khâr a ni dawn. Serchhip SP R Sathiyasundaram chuan, rîkrum thil tih loh chu lirthei tlân phal a ni dawn lo tih a tarlang.

Serchhip District Magistrate Dr Lalzirmawia Chhangte chuan, dawrkaite'n mipui ni tin mamawhte an lâkna aia sang uchuak taka mipui hnena hralh phal a nih loh thu leh a man âwm tawk chhiar tur a nih thu a puang a; bungrua, a vàn huna hlâwk zawka hralh beisei vanga chheh rûk phal a nih loh thu a tarlang bawk.

Mamit district-ah Covid-19 laka inven nan khung hran (quarantine) mek mi pariat an la awm. Mahni ina inkhung hrangte leh sorkarin centre a siama khung hrante chu ni 14 an awm tlin hnuah an hriselna a ṭhat avangin chhuahtir an ni a, Mamit khawpuia chengte chu Mamit District Task Force-in certificate a pe ṭhin a ni.

Zoram Medical College (ZMC) aṭanga thu dawn danin, Covid-19 kaihhnawiha ZMC Hospitala enkawl mek zingah nimin khan sample test tur a awm lo. ZMC-a Covid-19 Sample Testing Laboratory hman theih a nih hnua sample test tawh zawng zawngte chuan Covid-19 an kai lo vek a ni.

YMA Sub-Hqrs., Kolasib president C Liankunga chuan, ramri hrûla village task force duty-te chu an hah tak zet thu Vanglaini palai a hrilh a, "A theih ang angin tlem lua leh tam lua awm lo, mimal emaw pawlin ṭanpuina pe thei ila a duhawm hle. Chhun zan zawmin an duty a, kan ram leh hnam himna atan an thawkrim tak zet a ni," a ti. Duty-te chu Kolasib Sub-Hqrs. YMA pawhin an vil reng thu a sawi bawk.