Myanmar ram ṭanpuina turte IAF-in Lengpui Airport-ah an dah

Sorkar laipui chuan April 1, Thawhlehni khan Indian Air Force (IAF) thlawhtheihna C-17 Globemaster hmangin Myanmar lirnghing vanga ṭanpui ngaite ṭanpuina tur thil chi hrang hrang Lengpui Airport-ah a rawn dah.

Thu dawn danin, IAF thlawhtheihna hmang hian tui, buhfai, damdawi, mutbu leh thil dang metric ton 65-a rit phurh a ni a, Lengpui Airport-ah hian Assam Rifles-te'n an lo hlángthla a, airport aṭangin truck hmangin Zokhawsang an panpui. Zokhawsang aṭang hian Myanmar lam panpui leh a ni ang.

Myanmar ram hi March 28, 2025 khan lirnghingin na takin a sâwi a, in tam tak a chim a, mi 3,000 vel an thi tawh. India sorkar chuan lirnghing vanga Myanmar-in chhiatna a tawhah ṭanpui hna a thawk mek a, Operation Brahma tia vuah a ni.

Sorkar laipui chuan Myanmar ṭanpuina atan bungrua ṭhahnem tak a thawn lut tawh a, chhanchhuah hna leh hliam enkawl hna thawk tur pawh tir lutin, Mandalay-ah India Army Field Hospital Unit din tawh a ni.