Lawngtlai dist-a kawlphetha thlen lohna khaw 13-ah pek thuai a ṭul - Governor

Governor Gen. Dr Vijay Kumar Singh chuan nimin khan Lawngtlai a tlawh a; sorkar hotute leh khawtlang hruaitute kâwmin, Lawngtlai district-a kawlphetha (power supply) la thlen lohna khaw 13 hnenah pek thuai a nih theih nan hmalak a ṭul thu a sawi.

Governor hian sikul 14 hnenah Numaligarh Refinery Limited-in Lawngtlai district-a zirna tihhmasawnna tura CSR aṭana an pek smartboard a hlan a; Diltlang South khuaa in kâng neitu chhungkaw pakua hnenah Governor's Discretionary Grant aṭangin Rs 1,00,000 ṭheuh leh in luahtu chhungkaw pariat hnenah Rs 5,000 ṭheuh a hlan bawk.

Gen. VK Singh chuan, sorkar department, village council leh tlawm­ngai pawlte chu khawtlanga dâwm kân ngaite ngaihvena pui zel turin a chah a, "Lawngtlai district chhunga khaw 13, power supply pek la ni lote'n an neih thuai theih nan hmalak a ṭul," a ti.

Free Movement Regime (FMR) chungchangah Larsap chuan, "Ramria zalen taka inkalpawhna FMR hi tun hma aṭanga lo neih tawh ni mah se, tun hnaiah ṭhenawm ram buai vangin khua leh tuite him zawk nan leh dan loa ramri kâna thil tih a awm loh nan inkaihhruaina thar siam a ni," a ti a, harsatna siam tumna ni loin, khua leh tuite tana ṭha tura ruahman a nih thu a sawi.

Governor chuan, ramri kaltlangin ruihhlo tawlhrûk a hluar hle tih sawiin, "Mizoram hi ram ralmuang leh nuam a nih zel theih nan ṭanrual a pawimawh," a ti a; sorkar laipui scheme hrang hrangte mipuite'n an chhawr ṭangkai theih nan ṭan lak a ṭul thu a sawi bawk.

Inkawmhonaah hian District bawrhsap Cheemala Siva Gopal Reddy-a'n Lawngtlai district dinhmun leh mamawhte a sawi a ni.