KHAWTHLIR

Dragon fruit Training buatsaih

Mizoram Dragon Fruit Association, Kolasib district chuan nimin khan KVK, Kolasib hmunah National Centre for Integrated Pest Management, New Delhi bultumin dragon fruit enkawl dan zirhona an buatsaih. Kolasib KVK subject matter specialist (horticulture) PC Lalrintluanga leh subject matter specialist (agriculture engineer) R Lalchhandami ten thil pawimawhte an zirtir a; dragon fruit enkawlna damdawi sem a ni bawk.

Meth man

Assam Rifles, Mizoram Police leh Bualpui (NG) Joint YLA ṭangho chuan tun hnai khan Bualpui (Ng), Lawngtlai district ram chhunga Serzawl kawngah Myanmar lam mi hnen aṭangin methamphetamine kg. 4.600 (mûm 42,000) an man.

Ruihhlo do sawiho

Khawzawl District Narcotics Coordination Centre (NCORD) chu nimin khan an ṭhukhawm a, bawrhsap K Vanlalṭhiana kaihhruaiin, sorkar hotute leh Sub-Headquarters YMA hruaitute an tel a, ruihhlo do chungchanga hmalak dan tur an ngaihtuah. Ruihhlo man a tlawm avanga ruihhlo ngai an tam tawh thu leh ruihhlo vanga mante court-ah thiam loh chantir a harsat tawh thute tarlan a ni.

MLA-in tlawh

Lawngtlai East bialtu MLA Dr Lorrain Lalpekliana Chinzah, adviser to chief minister chuan nimin khan Lawngtlai West bial chhung, Sekulh MDC biala khaw pariat a tlawh a, ZPM zawm thar mi eng emaw zat a lawm lut. Dr Lorrain Lalpekliana hian khawtlang hruaitute a kâwm a, an mamawh leh harsatna an neih an lo thlente a ngaihthlaksak a ni.

Kawng khâr dawn

Bilkhawthir - Saiphai inkara Chepte-ah PWD chuan semi permanent timber (SPT) lei (bridge) an dawh mek chu zawh a la nih loh avangin April 3-4, 2025 chhung kawng khar a nih tur thu Kolasib SP David H Lalthangliana'n a tarlang. Kawng hmang ṭhinte chu kawng khâr chhungin Phainuam-Saiphai kawng lamah kal turin a hriattir bawk.