Sorkarin MUHCS thar a kalpui ṭan; PHC leh CHC ṭangkai zawka hman a ni dawn - Health Minister

Mizoram Universal Health Care Scheme (MUHCS) chu April 1, 2025 khan kalpui ṭan a ni a, khua leh veng hrang hrangah inziah luh theih ṭan a ni. Health & Family Welfare minister Lalrinpuii chuan, Mizoram thingtlanga damdawi-in - primary health centre (PHC) leh community health centre (CHC)-te chu ṭangkai zawka hman a nih tur thu a sawi.

MUHCS kalpui ṭan a nih avang hian April 1, Thawhlehni khan Directorate of Hospital & Medical Education auditorium-ah zirho a ni a, HFW Minister-in a hmanpui. Zirhona hi HFW principal director Dr Lalthlengliani'n a kaihruai a; district tina chief medical officer leh medical superintendent te, community health centre leh primary health centre-a hotute an tel.

MUHCS hi kalpui ṭan a nih tawh angin khua leh veng tam takah health sub-centre leh health clinic-ahte inziah luh theih a nih thu khawtlang mipui hriatah puangzar a ni tawh a; la puanzar lohna khua/veng a awm nual bawk.

Health Minister chuan, PHC leh CHC emaw, district hospital emaw aṭanga khawpui lian zawka damlo thawn chhawn hmain thawktute'n theihtawp chhuaha an enkawl hmasak a pawimawh thu a sawi a, "Hetianga hna kalpui a nih chuan Mizorama PHC-a khum 500 vel leh CHC-a khum 270 velte chu ṭangkai zawk a hman a ni dawn a ni," a ti.

Lalrinpuii chuan, PHC, CHC leh district hospital-ahte ṭha zawka damlo enkawl an nih chuan khawpui damdawi-ina khum indaih lohna vanga harstana thleng ṭhin a ziaawm theih dawn thu a sawi a; chutih rualin, tih theih chin bâk harsatna a awm chuan damdawi-in lian zawka damlo thawn chungchangah inthlahrung lo turin damdawi-in hotute a chah.

Damdawi-in pakhat aṭanga awlsam zawka sorkar thawhpui damdawi-in danga damlo thawn a nih theih nan Medical Referal Board piah lamah empanelled hospital-a specialist doctor-te thuthlukna chu pawm a nih tur thu Minister chuan a sawi bawk.

HFW Minister chuan, kut hnathawktute leh khawsak harsate dinhmun chawikan leh an harsatna chhâwk zângkhai chu sorkar ngaih pawimawh ber zinga mi a nih thu sawiin, "Mirethei zawkte chhawmdawlna mamawh pui ber pahnih chu chhiat tawhna leh dam loh nikhua hi a ni. Chhiat tawh chungchangah sorkarin ruang a phurhsak tawh a, dam loh nikhuaa sum sen phuhrûkna MUHCS tlangzarh a ni tawh," a ti.

MUHCS chu mipuiin ṭangkai taka an hman theih nan HFW department hnuai a thawkte an pawimawh hle thu sawiin Lalrinpuii chuan, "Kan kutzála mawhphurna tlate hlen kawngah theihtawp kan chhuah a pawimawh," a ti. HFW department-a thawkte chu khawtlang leh mipui hriselna kawnga mawhphurna pawimawh tak chelhtu an nih avangin dawhtheihna leh inpekna thûk tak nen an thiamna leh theihnate khawtlang tana hmang zel turin a chah.

Health Minister chuan, MUHCS hlawhtling taka kalpui a nih theih nan HFW department thuam ṭhat a ni dawn a, damdawi-in hrang hranga dah tur medical doctor pariat, nurse 300, dialysis technician 10, laboratory technician 10, x-ray technician 15, pharmacist paruk, public relations officer pali, accounts manager pathum leh data manager 15 lakna tur kalpui mek a nih thu a sawi bawk.

MUHCS zirhonaah hian Health Services director Dr Hmingthanmawii, Hospital & Medical Education director Dr Ngurchamliana leh joint director (Nursing) Lalchhanhimi te pawhin thu an sawi a ni.