Mamawh lak luh dan tur sawiho

Transport minister TJ Lalnuntluanga kaihhruaiin Inrinni khan Mizoram páwn aṭanga mamawh phurh luh dan turah inràwnkhawmna neih a ni a; Chief Secretary, Task Group on Transport Committee, Home department leh FCSCA department hotute bakah, Mizoram Truck Drivers’ Association leh Mizoram Truck Owners’ Association hruaitute an tel.

TJ Lalnuntluanga chuan, inthlahdah loa theihtawp chhuaha fi mkhur zual a ngaih thu sawiin, "Mizoram mamawh ei tur leh bungrua chi hrang hrang kan lak luh reng a ngaih avangin him taka kan kalpui dan tur ngaihtuah a ngai a ni," a ti a; Mizoram mamawh phur luttu te, damdawi lam hnathawk te, police leh task forcete thawhrimna chu chhuanawm a tih thu a sawi.

Chief secretary Lalnunmawia Chuaungo chuan, inkhârkhip thlahdul emaw, hlih emaw hun tur hriat a nih loh avangin fi mkhur reng a ṭul thu a sawi a, "Tunah hian kan him thawkhat tawh angin inhre mah ila, kan chhehvelah hri vei an pun zel avangin kan fi mkhur a ngai em em a, tuna a lan dan chuan state páwn lam aṭanga rawn lutte aṭangin kai theihna chance a awm a ni," a ti.

Inrawnkhawmnaah hian, Transport departmentin Mizorama bungraw phurh luh chungchanga inkaihhruaina tur 'Standard Operation Procedure (SOP)' a ruahman te, driver leh handyman-te an him theih dan turte sawiho a ni a; sawihona aṭangin sorkar chuan SOP mumal tak duan a tum a ni.