Covid-19 dona atana sum lut leh chhuak Langtlang taka kalpui turin sorkar phût

ZPM Legislature Party leader Lalduhoma chuan, chief minister Zoramthanga'n Covid-19 laka invenna leh dona atana sum ‘limit' a awm loh tur thu a sawi chuan a tihthlamuan thu a sawi rualin, task force-te hnena sum lut erawh a la tlem thu leh level tina task force-te kuta sum lut tawh zat langtlang taka kalpui an phût thu a sawi. Lalduhoma'n Covid-19 chungchangah April 11-a statement a siama a tarlan danin, India sorkarin ram pum tan cheng vbc. 1,70,000 a ruahman a, Mizoramin vbc. 23 a chang a, PM-KISAN hnuaiah loneitu 40,890-te Rs. 2,000 ṭheuha pek tur nuai 817.80 hmuh a ni.

Chhungkaw harsa zual tan thla thum chhung buhfai a thlâwna sem tur niin, Ujjawala scheme-ah gas bûr a thlawna pek tur a ni a, Labour Welfare Board-a inziak lutte Rs. 3,000 ṭheuh pek tur a nih bakah, ni za inhlawhna rate tihsan a ni. India Covid-19 Emergency Response and Health System Preparedness Package siam thar a ni a, chumi hmang chuan PPE, mask, ventilator, testing kit leh damdawi leinate Central-in a tum dawn a; isolation room leh ICU siamna, laboratory dinna, sample buaipuina senso leh thawktu lak belhna turte a tum vek dawn a ni. Chumi bakah, NEC aṭangin cheng nuai 300 hmuh a ni baw.

Lalduhoma chuan, sorkar laipui sensoa hmanraw hrang hrang neih theih a nih lai hian chet vat vat a ṭul thu sawiin, "Tun hnaiah ICMR pawm pui rapid test kit siam thar a ni a, Rs. 400 man a ni. Duty-na hmun tina hman khawp tur lei vat a ṭha ang," a ti. Hripui laka invenna leh donaa hman tur kohhran, pawl leh mimal ṭhahnem takin pawisa an thawh chu ropui a tih thu leh, chu'ngte chu langtlang taka kalpui a ṭul thu a sawi.

April3, 2020-a IPR press release-a a lan danin, CM Relief Fund aṭangin cheng nuai 118.55 pek chhuah a ni a, village/local task force 889-te chan tur cheng nuai 88.9 a tel. April 4-a IPR press release-ah D&R department kaltlangin Rs. 4,28,03,000 pek a ni a, task force-te hman tur Rs. 1,24,98,000 a tel. IPR press release April 9-ah CM Relief Fund aṭangin district 11 tan Rs. 22,850,000 ruahman a lang.

Covid-19 dona atana Mizoram sorkarin sum a hmuh zat ngaihtuahin, sum hman tura ruahman tawh zat Rs. 6,56,53,000 chu a la tlem hlea a hriat thu sawiin Lalduhoma chuan, "Nagaland chuan a tirah vbc. 17.5 a pe nghal a, Arunachal pawhin vbc. 19.42 a pe nghal," a ti a; state dangte leh Supreme Court thupekte sawi langin, "Mi state-te chu kan el pha lo a ni thei. Mahse, sorkar hi tun ai hian thilphal se, che rang deuh se a lawmawm khawp ang," a ti. ZLP Leader chuan, inkharkhip chungchangah, "Kan ṭhenawm state-te chet dan hre chunga kan rêl erawh a ngai ang.

Anni an inthlahdul poh leh kan ramri te, a bikin lui dungte kan ven ngun a ngai dawn a ni," a ti a; sorkar chu mipuite'n an nawr kal chawp ngai leh ultimatum hial an pek ngaiin awm tawh lo se a duh thu leh minister-te inkarah thawhhona ṭha tak awm se a duh thu a sawi bawk. Lalduhoma hian Covid-19 chungchangah Pathianin Mizote chunga zahngaihna a lantir avang leh Health minister Dr R Lalthangliana inpekna leh thawhrimnaah lawmthu a sawi bawk a ni.