Lungleia ward fai ber - Ward no. 2

Lunglei Municipal Council (LMC) chuan Lungleia LMC ward-te faina leh thianghlimna lama inelna result puanna leh lawmman hlanna hun April 1, Thawhlehni khan Convention Centre-ah an buatsaih a; Ward-2 chu ward fai ber a ni.

LMC Award 2024-25 dawng tur thlannaah hian LMC-a ward 11-te endik a ni a; veng pahnih - Serkawn leh Zohnuai awmna Ward-2 chu ward fai berah thlan niin, lawmman Rs 3,00,000 hlan a ni. Pahnihna Ward-1 (Pukpui leh Zotlang)-in Rs 2,00,000 an dawng a, pathumna Ward-9 (Salem Veng leh Lunglawn)-in Rs 1,00,000 an dawng. Ward-11 (Lungpuizawl, Zobawk North leh Zobawk South)-in consolation prize an dawng bawk.

LMC Award hmasa ber semna inkhawma khuallian MLA V Malsawmtluanga, Lunglei High Powered Committee (HPC) vice chairman chuan, hrisel turin fai a ngai tih sawiin, LMC-in inelna a buatsaih chuan Lunglei mipuiah faina lama harh tharna a thlen a beisei thu a sawi.

Bawlhhlawh a báwma paih leh tui dah khawlna siamah hmasawn a ṭul thu sawiin V Malsawmtluanga chuan, "Ei tur vawn thianghlim kawngah te, mahni taksa enkawl fai kawngah leh thawmhnaw enkawl fai kawngah te, vantlang hmunhma, zun-in leh toilet enkawl fai kawngahte hmasawn zel a ṭul. Lunglei HPC pawh faina kawnga hma la turin a inhawng reng a ni," a ti.

HPC Vice Chairman chuan, faina chu LMC leh khawtlang hruaitute mawhphurhna chauh ni loin, mi tin mawhphurhna a nih thu a sawi a; mahni tihbawlhhlawh ni kher lo pawh tifaitu nih tum tur leh mahni hmun ṭheuhah bawlhhlawh siamtu ni lo tur leh tifaitu nih tum turin mipui a chah.

LMC chairman Lalzuithanga pawhin thu sawiin, LMC Award 2024-25 hlawhtlinna tura thâ thawhtu zawng zawng chungah an lawm thu a sawi a; LMC-in faina kawngah hma a la zel dawn tih sawiin, sorkar office te, ward committee te, local council te, pawl hrang hrangte leh mipui ṭawiawmna a ngen.

LMC Award 2024-25 hnuaiah hian LMC chhunga LC 24-te chu an awmna bial (ward) angin an inel a; LMC secretary Lalrinawma kaihhruaina hnuaiah endiktu - Lungleia YMA Sub-Headquarters President, Sub-Headquarters MHIP President leh MJA President-te an awm.

Award hlanna inkhawm hi LMC vice chairman K Lalrin-awma'n a kaihruai a; LMC chief executive officer Donny Lal-ruatsanga'n award buatsaih dan sawifiahin, result a puang a ni.