Lunglei khawpuia lungrem leh step-te LMC-in rawng inang hnawih an rêl

Lunglei Municipal Council (LMC) hnuaia Municipal Sanitation Committee chu an chairman K Lalrinawma, LMC vice chairman kaihhruaiin nimin khan BoC Hall-ah an ṭhukhawm a; Lunglei khawpui faina leh mawina atan retaining wall/step-te rawng thuhmun hmanga chei an rêl.

Ṭhutkhawmah hian Lunglei khawpui faina leh mawina atana retaining wall/step ang chite rawng thuhmun (uniform colour coding) hmanga chei ṭha an ti a, LMC rawng - a pawl leh a vara chei dan ngaihtuah ni se, an ti.

Lunglei chu bawlhhlawh thlahdah awm lohna khawpui a nih theih nan hmalak ṭha an ti a, a ṭul anga ruahmanna siama bawhzui ni se, an ti. He hmalakna atan hian LMC Award dawngtu ward palite chu garbage free local council pilot project kalpui nan rawt a ni.

LMC huam chhunga faina chungchang inzirtirna tlangaupui a, tihlâr turin faina palai (cleanliness ambassador) turte an ruat a; khawpui chhung hmun remchang leh langsar laiahte faina inzirtirna thuziak (signage) tar ni se, an ti. Mizoram sorkara LMC Solid Waste Management Regulations thehluh tawh chu a hma thei ang bera pawmpuina hmuh a nih theih nan bawhzui ni se an ti bawk.