Ram dang mi ID card pek an nih lohna atana hmalak dan tur rel

Lunglei Bawrhsap Navneet Mann hoin nimin khan DC conference hall-ah India khua leh tuite hnena pek ṭhin nihna tihchianna (identity card) hrang hrangte ram dang mi, a bikin Myanmar leh Bangladesh aṭanga rawn lutte hnena pek a nih lohna tura hmalak dan tur rêl a ni.

Lunglei Bawrhsap chuan, ram dang aṭanga raltlan emaw, dan ang emaw, dan lo emawa rawn lutte'n India khua leh tuite hnena pek ṭhin ID card hrang hrang neih an tum ṭhin tih a sawi a, "Chu chuan khua leh tuite chanvo leh hamṭhatna hmuh tur a tikiam a, a chhuhsak ṭhin. Hemi veng tur hian khua leh tui ni lote hnena ID card pek chhuah a nih loh nan fimkhur a ṭul," a ti.

Ṭhutkhawmah hian ram dang mite hnena ID card hrang hrang pek chhuah palh venna tura fimkhurna tur leh hmalak dan tur rawtna hrang hrang te, harsatna awm ṭhinte tarlana sawihoa ni.

Certificate leh ID card dilna atana finfiahna leh hriatpuina pek chhuah chungchangah te, certificate/ID card lem hmang an lo awm pawha hmu chhuak vat thei tura endikna kawngahte mahni zâwn ṭheuhah fimkhur leh ṭan lak lehzual ni se, an ti.

Ram dang mite'n lirthei, ram, in leh bungraw dang an lei theih nana khua leh tuite zinga mahni hming leh nihna lo hawhtir a awm loh nan mipuite an fimkhur lehzual a ṭul thu te, khua leh tui zawng zawng ṭanho a ṭul thute tarlan a ni bawk.

Lunglei district-a raltlan awmte fel taka chhinchhiah a ni a, DC office aṭangin temporary ID siamsak ṭhin an nih thu tar lan a ni. Lunglei DC office-in an chhinchhiah danin, tun dinhmun (April 2025)-ah Lunglei district-ah Myanmar mi raltlan 1,971 leh Bangladesh mi raltlan 63 an awm mek a ni.

Ṭhutkhawmnaah hian DC office-a officer-te bakah, card/certificate hrang hrang - voter ID card, Aadhaar card, birth certificate, ration card, etc. pe chhuaktu office hrang hrang aiawhte, Lunglei District VC/LC Association leh Lunglei Sub-Headquarters YMA aiawhte an tel.