NY-a school September-ah hawng dawn chauh
US-a khawpui zinga hri leng tuar nasa ber, New York-a public school-te chu academic year kal mekah khar tluan an ni dawn a, September thlaah hawn an ni dawn chauh tih mayor Bill de Blasio chuan a puang.
Khawpuiah hri leng hian zual lam a la pan zel avangin US-a khawpui lian ber, New York-a public school-te chu school year tawp thleng khar an ni dawn tih a sawi a ni. He thutlukna siam hi thil harsa tak ni mah se, nunna chhanhimna atan a ṭul tih a sawi. School khar hian khawpui chhunga zirlai maktaduai 1.1 vel a nghawng a ni.
Mahse he thu a puan hnu lawkah hian New York state governor Andrew Cuomo chuan sawiselin, hetianga thutlukna siam theitu chu amah zawk chu a nih thu a sawi. Metropolition region pum dinhmun ngaihtuah pui tel loin, New York khawpui chhung ringawt ngaihtuaha thutlukna siam mai chi a ni lo tih a sawi. Mayor hian school khar turin thuneihna nei mah se, governor thupekin a thuneihna hi danchah sak a ni thei tih legal expert-te chuan an sawi.