Zokhawtharah ramsa tawlhrûk 31 man

Assam Rifles leh Environment, Forest & Climate Change department-a thawkte chuan April 2, Nilaini chawhma dar 10.30 vel khan Zokhawtharah ramsa (exotic animal) chi hrang hrang dan kalha khawchhak lam ram aṭanga tawlhrûk 31 an man.

The Wildlife (Protection) Act, 1972 kalha ramsa tawlhrûk mante chu - saphai (Albino Burmese Python) pakhat, satel (African spurred tortoise) 27 leh sazu/sazupui lam chi (Patagonian mara) pathum a ni a; international market-ah cheng nuai 130 vel mana chhût a ni tih sorkar thuchhuahin a tarlang.

Ramsa tawlhruka inhnamhnawiha puh mi paruk pawh man nghal an ni a, Champhai District Court-ah hruai niin, Court thu angin Champhai District Jail-ah dah luh an ni.

March 26, 2025 pawh khan EFCC department-a Khawzawl Wildlife Division-a thawkte chuan dan kalha Khawzawl rama sakhi (barking deer) leh varung (rufous throated partridge) kâptua puh Biakchungnunga s/o Thansei (L) Khawzawl Lungvar Veng chu a sa kahte nen an man a; Champhai District Court thupek angin Champhai District Jail-ah dah a ni bawk.

RAMSA TAWLHRÛK VANGA MANTE

1. Jessie Lalnunmawia s/o Kapkunga, Zokhawthar

2. Biakzapianga s/o Neicheulian, Zokhawthar

3. Lalzuitluangi d/o Sangkhuma, Zokhawthar

4. Denga s/o Neya, Zokhawthar

5. Lalhmangaihthanga s/o Pawibawiha, Zokhawthar

6. Thawnsuangmuang s/o Sankhawpau, Khawmawi, Myanmar