Kuminah GATS-3 zirchianna nei dawn; Vaihlo ti zat titlahniam turin mipui ngen

National Tobacco Control Programme (NTPC), Mizoram hotute chuan, vaihlo zuk leh hmuama khawvel pum dinhmun zirchianna, Global Adult Tobacco Survey (GATS) chu kumin chhungin Mizoramin a hmachhawn dawn tih an sawi a; zûk leh hmuam ti zat tlakhniam lamah Mizoramin hma a sawn theih nan theihtawp chhuah turin Mizoram mipui an ngen.

Khawvelah GATS ṭum hnih neih a ni tawh a, kumina neih leh tur hi a vawi thumna (GATS-3) a ni. Mizoramin GATS-3 a hmachhawn tur pualin NTPC, Mizoram hotute chuan nimin khan Aizawl Press Club-ah thuthar thehdarhtute pualin inzirtirna hun an buatsaih a, vaihlo chungchanga Mizoram dinhmunte an tarlang.

NTPC, Mizoram state consultant R Lalremruata chuan zawhna chhangin, GATS-3 atana zirchianna (survey) chu kumin May thla velah zir chiangtu turte'n an ṭan dawn nia an hriat thu a sawi a, "Kumin chhungin neih tur a ni," a ti.

R Lalremruata chuan, Mizoram chu kum 2009-2010 chhunga zirchianna GATS-1 aṭangin kum 2016-2017 chhunga zirchianna GATS-2 ah hma a sawn thu a sawi a, "GATS-2 aṭangin GATS-3 ah hian hma kan sawn theih nan Mizoram mipui kan ṭan tlan a ngai," tiin mipui a sáwm a; vaihlo zûk leh hmuam la ti mekte chu sim tum turin a ngen.

NTPC State Consultant tarlan danin, GATS-1 ah chuan Mizoramah vaihlo zûk leh hmuam ti ṭhin 67.2% a nih laiin, GATS-2 ah chuan 58.7%-ah a tlahniam. Mei zu ṭhin GATS-1 ah 39.7% a nih laiin, GATS-2 ah chuan 34.4%-ah a tlahniam a, vaihlo leh vaihlo aṭanga siam ei/hmuam GATS-1 ah 40.7% a nih laiin, GATS-2 ah chuan 33.5%-ah a tlahniam a ni.

NTPC state nodal officer Dr H Lianthangpuia chuan, nun dan leh thil tih ṭhinte avangin mihringte'n natna an nei thei tih a chian thu sawiin, "Kan thih hun pawh kan nun dan leh thil chin ṭhin hmangin kan pawt tawiin kan pawt sei thei. Vaihlo hian cancer a thlen tih a chiang a, scientific proof awm thlap a ni," a ti a; thil ṭha an hriatte a taka nunpui turin Mizoram mipui a chah.

NTPC hruaitute chuan, e-cigarette chu danin a khap thu sawiin, engti zawng pawha zûk/hman khap a nih thu an sawi a; film, music video leh video dang, eng media pawh kaltlanga tihchhuahah vaukhànna thu (warning) dah tel loa mei zu lai tihlan phal loh a nih thu an sawi bawk.