Kulikawn YMA-in First Cry dawr khar turin an ti

YMA, Kulikawn Branch chuan an veng chhunga dawr First Cry neitute chu April 3, Ningani khan lehkha an thawn a; dawr neitua ngaih Henry Lalbiakzinga chu ruihhlo tam tham tak mannaah a tel ve avangin Kulikawna an dawr chu titawp turin an ti.

YMA, Kulikawn Branch chuan, First Cry neitute chu tunlaia an chhungkuaa thil thleng, ram hmelma leh Mizoram rún chhe mektu ruihhlo tam tham tak mannaah Henry Lalbiakzinga a tel ve pawi an tih thu an hrilh a, "Min barakhaih tak zet a ni," an ti.

Kulikawn huam chhunga First Cry dawr titawp turin thutlukna an siam thu Kulikawn YMA chuan an tarlang a, "In chungchang hi uluk taka kan ngaihtuah hnuah kan veng chhunga awm First Cry dawr hi kan veng chhunga a awm loh kan veng tan leh in chhungkaw tan a ṭha zawkin kan hria. Kulikawn Branch YMA chuan in dawr hi titawp turin kan ngenin kan hriattir a che u," tiin an ziak.

First Cry dawr tihtawp chungchanga YMA thutlukna chu zahsak turin YMA, Kulikawn Branch chuan dawr neitute an ngen nghal bawk.