2023-24 ah thisen unit 34,752 pek a ni; Voluntary donation target khûm

Sorkar kum liam ta, 2024-25 chhung khan Mizoramah thisen unit 34,752 pek niin, chu'ng zinga 93.71% chu pek bik nei loa a thlâwna pek (voluntary donation) a ni. Association for Voluntary Blood Donation (AVBD), Mizoram chuan, voluntary donation target an siam khûm a nih thu an tarlang a; chutih rualin, thisen pek uar deuh deuh turin mipui an ngen.

Blood Transfusion Service, Mizoram State AIDS Control Society (MSACS) chhinchhiah danin, April 1, 2024 - March 31, 2025 chhung khan Mizorama blood centre 11-ah thisen unit 34,752 pek a ni a, chung zinga unit 32,566 chu voluntary donation niin, 93.71% a tling. AVBD-in voluntary donation target an siam chu 92% a ni a, 1.71%-in khûm a ni.

Blood bank hrang hrangte'n kum liam ta chhung khan blood donation camp vawi 611 an buatsaih a, chungah chuan thisen unit 22,602 pek a ni a, camp-a pek zat hi pek zawng zawng aṭangin 65.04% a tling.

A thlawna thisen pek zat percentage sanna ber chu Civil Hospital, Lunglei niin 99.87% a ni a, Christian Hospital, Serkawnin dawtin, 98.04% a ni. Voluntary donation hniamna ber chu Lawngtlai District Hospital niin, 75.27% a ni a; Lawngtlai District Hospital chiah hi 90% kai lohna blood bank a ni.

Hetih lai hian, Mizorama thisen pek zat hi kum hnih chhung chu a tlahniam tawh. Thisen pek a tam ber kum chu 2022-23 kha niin, unit 37,419 pek a ni a, a kum leh 2023-24 ah 1,800-a tlem zawkin, unit 35,619 pek a ni. Kum 2024-25 unit 34,752 pek a ni a, a hma kum aiin unit 867-in a tlem zawk.

AVBD, Mizoram chuan thuchhuah siamin, financial year 2024-25 chhunga voluntary blood donation percentage zat thlen an tum (target) 92% khûm a ni chu an lawm thu an tarlang a, "Target hi tihhlawhtlin ngei tumin blood centre hrang hrangte nen theihtawp chhuah a ni a, Mizoram mipui, a bikin ṭhalaite'n theihtawp an chhuah bawk. Sorkar lama hotute leh mipuite nen kan ṭanrualna avangin target kan khûm thei hi lawmawm kan ti a, target khûm a nih theih chhan, thisen petute zawng zawng chungah kan lawm tak zet a ni," an ti.

AVBD chuan, Mizoramah thisen mamawhna a sang reng tih sawiin "Thisen pek hi tawpsan mai theih a ni lo. Thisen mamawh damlote'n a hun takah thisen an dawn theih nan leh nunna chhanna atan thisen pek uar zel turin mipui kan sâwm," an ti a; thisen pek lamah Mizoramin hma a sawn zel theihna tura AVBD hmalaknate ṭawiawm zel turin mi tin an ngen.

April chu Good Friday thla a nih thu sawiin AVBD chuan, Good Friday puala thisen pe turin ṭhalaite an ngen a, "Chhandamtu Isua kraws-a khenbeh a ni a, kan tana thisen chhuaka a tawrhnate hre rengin, mi dangte kan chhanhim ve theih nan Good Friday puala thisen pek hi a inhmeh em em a ni," an ti.

AVBD hian March 27, 2025 khan kum 2025-2027 chhunga office bearer turte an thlang a, April 4 khan charge inhlanna hun an hmang. AVBD office bearer-te chu - president C Lalnunnema, vice president K Zothanpara, general secretary Lalrinkima, joint secretary Isaac Laldawngliana, treasurer F Lalmuanpuii, finance secretary Malsawmtluangi leh publicity secretary Jacob Lalruatpuia te an ni.