Mi 1,386 tàn theihna tur ruahman Mizorama jail 10-ah mi 1,683 an táng

April 1, 2025 dinhmun angin Mizorama jail 10-ah mi 1,683 an táng a, an nute tàn vanga jail-a awm ve naupang 12 nen an vaiin mi 1,695 an awm. Táng zingah hian dam chhunga táng tura hrem mi 56 leh hrehawm taka táng tura hrem mi 361 an tel a; jail 10 zinga pangaah táng thei tur bituk zat aia tam an táng.

Mizorama jail 10-te hi mi 1,386 tàn theihna tura ruahman a ni a, chutih laiin, jail pangaah táng thei tura bituk zat aia tam an tàn avangin jail táng zawng zawng mi 1,695 (nute tàn vanga awm ve naupang 12 telin) an ni mek; táng thei zata ngaih aia táng mek an tamna hi mi 309 an ni.

April 1, 2025 dinhmun angin, Mizorama jail 10-ah hian an chungthu ngaihtuah mek mi 1,052 an awm a, mipa 912 leh hmeichhia 140 an ni.

Court-in thiam loh a chantir (convict) tawh mi 631 an awm a; chungte chu tàn pangngaia táng tura hrem mi 214 (mipa 203 leh hmeichhia 11), hrehawm taka táng tur mi 361 (mipa 330 leh hmeichhia 31) leh, dam chhunga táng tur mipa 56 an ni.

Táng tamna ber Central Jail chu mi 438 tàn theihna tura bituk a nih laiin mi 806 an táng mek a, mipa vek niin, bituk zat aia tang tamna hi 368 a ni. Lawngtlai District Jail chu táng tlemna ber a ni mek a, mi 98 tàn theihna turah mi 28 an táng mek.

Mi 96 tàn theihna tura duan Central Women Jail, Aizawlah April 1 khan táng mi 128 bakah, an nute tàn vanga jail-a awm ve naupang pariat an awm a; Lunglei District Jail-ah an nute tàn vanga jail-a awm ve naupang pakhat leh Champhai District Jail-ah naupang pathum an awm bawk.