END leh Sub.Hqrs YMA-in ruihhlo do inzirtirna buatsaih

Excise & Narcotics department leh YMA Sub-Headquarters, Saitual ṭang dun chuan April 6, Inrinni khan Saitual DC conference hall-ah ruihhlo do inzirtirna an buatsaih a; ruihhlo ngaite, khawtlang hruaitute leh line department-te telin, ruihhlo ti lo tura intiamna ‘signature campaign’ neih a ni.

Saitual END officer in charge R Lalruatliana chuan, Saitual district-ah ruihhlo kaihhnawihin a hrin chhuah rûkrûk a hluar thu sawiin, "Ruihhlo do kawngah hmalak a ṭul hle a, thâ thlah loa theihtawp chhuah zel kan tum," a ti a; khawtlang hruaitute chu thawhhopuiah a sáwm.

SRS chairman C Lalremruata chuan, ruihhlo ngaite pui turin an inhawn reng thu leh harsatna an tawhte chu inthlahrung loa hriattir zel turin a chah. MHIP Sub-Hqrs president Lalbiaktluangi pawhin thu sawiin, ruihhlo vanga ṭhalai tam tak an buai chu pawi a tih thu leh END nen ṭang duna hma an la chho tur chu bung thar a nih thu a sawi.