Education Minister-in Central sorkar hotute a dâwr

Education minister Dr Vanlalthlana chuan tun hnai khan New Delhi-ah sorkar laipui hotute a dawr kual a, Mizoram zirnain hma a sawn theih dan tur te, harsatnate leh mamawhte a thlen.

Dr Vanlalthlana hian April 4, 2025 khan NITI Aayog member Dr VK Paul chu Mizorama zirna leh technology tihhmasawn dan tur hrang hrang a sawipui a; Mizorama Education Conclave neih rawtna sawiin Minister chuan, Mizoram zirna ruangám enfiah nan a ṭul thu leh hmasawn ngaihna lai, a bikin ziak leh chhiar thiam tam nihna chu ram pum huap exam-a tih ṭhat nan leh hna thawka rawih tlak tam zawk chher chhuah nan hmanraw ṭangkai tak a nih dawn thu a sawi.

Mizorama Education Conclave neih rawtna chu NITI Aayog-in State Support Mission kaltlanga puih an inhuam thu VK Paul chuan a sawi tih sorkar thuchhuahin a tarlang.

Sorkar thuchhuah tarlan danin, Dr VK Paul chuan, secondary leh higher secondary zirlaite tana Mizoram sorkar pilot project - 'Project Intodelh' (Self-Sufficiency) chu NITI Aayog lam chuan ṭha nia an ngaih thu a sawi a; pawl 3 leh pawl 6 tana Random Examination 2024-25 neih aṭanga State Report Card an hnena thehluh chu best practice document-ah an pawm thu a sawi bawk.

Zirna hmuna zirlaite hriselna endik leh vil chungchanga hmalakna sawiho a ni a; VK Paul chuan, hlawhtling taka kalpui turin School Education department leh Health & Family Welfare department-te ṭan rual a ṭul thu a sawi.

Dr Vanlalthlana chuan, Mizoram University campus-a Software Technology Park of India (STPI) dinnaa Mizoram sorkarin harsatna a tawhte a thlen nghal a; NITI Aayog hotute chuan, harsatna tawhte chinfel thuai a nih theih nana hmalakpui an inhuam thu an sawi.

Dr Vanlalthlana hian April 4 vek khan DoNER minister Jyotiraditya Scindia leh DoNER secretary Chanchal Kumar te an pisaah a tlawh bawk a, Mizoram hmasawnna tura pawimawhte leh zirlaite'n mahni intodelhna kawnga ke an pên theih nana pawimawhte a thlen a ni.