Minister-in a enkawl department hmun tlawh

Minister Lalthansanga chuan April 4, 2025 khan Kolasib district chhunga a department enkawlte hmunhma a tlawh a, thawktute nen hmalakna leh hmachhawpte an sawiho.

Lalthansanga hian Kolasib-a LRSWC, Sericulture, Fisheries leh EFCC hmunte a tlawh a; Buhchangphaia Lalzamliana Fish Seed Farm a tlawh bawk.

EFCC minister Lalthansanga chuan, ei leh bara intodelh chu an thupui ber a nih laiin, mi rilruah agriculture lam a lian deuha a lan thu a sawi a, "Kan eia kan in ngawt hi a ni ber lo a, ei leh bara kan hman lem loh thil tam tak hmang hian intodelhna kawng kan zawh thei. Mizote'n kan eizawnna ber tlang ram loneih hian kan sik leh sa nasa taka a nghawng avangin a thlakna tur kan ngaihtuah a ngai a, central sorkar pawhin heti lam project hi a uar chho zel a ni," a ti.

Sik leh sa ti chhe lo leh ram humhalh theih nan eizawnna ngêlnghet zawk nei turin state sorkarin hma a lak mek thu sawiin Lalthansanga chuan, "Chutiang tur chuan department pawimawh tak tak a awm. Sericulture hi kan ram economy siam thei khawpin theihna ṭha tak mai nei a ni a, mipuite'n heti lama kan rilru kan pek theih nan awareness kan neih tam a ngai," a ti a; thawktu indaih lohnate a hmatiama chinfel zel an tum thu a sawi.

Fisheries minister Lalthansanga chuan, Mizoramah sangha hrisel leh tuihnai zawk thar theih a nih thu sawiin, "Heti lamah hian hma chak takin kan la mek. Kan ram thar ngei hmanga intodelh hi a tloin a hlu ber a, tualchhung thar chhuah hriat chian leh hrisel ṭha ei kan uar chho zel a, chhunzawm zel pawh a ṭha a ni," a ti.