Mizoram FSL leh NFSU-in MoU an ziak

Directorate of Forensic Science Laboratory (FSL), Mizoram leh National Forensic Sciences University (NFSU), Gujarat te chuan tun hnai khan thawhhona thuthlung, memorandum of understanding (MoU) an ziak. MoU kaltlang hian Mizoram FSL tihchanglun tum a ni a, NFSU hmanruate an hman ṭâwm thei a ni ang.

MoU hi NFSU, Gujarat-ah April 3, 2025 khan ziah a ni a; Mizoram FSL director T Lalropuia leh NFSU campus director Prof. Dr Naveen Chaudhari ten hming an ziak a, FSL Joint Director leh Deputy Director bakah, NFSU Dean leh Associate Dean mi 11 ten hriatpuituah hming an ziak bawk.

NFSU hi kum 2009-ah din niin, October 2020-ah ram tana zirna-in pawimawh dinhmun pek a nih bakah, central university-ah hlan kai a ni a, India sorkarin Centre of Excellence-ah a puang tawh. Mizoram FSL thawktute tarlan danin, NFSU hi forensic sciences university hmasa ber niin, thawhhona thuthlung hi international-ah 102 leh national-ah 147 an nei tawh. Mizoram Forensic Science Laboratory-in MoU an ziahpui ve thei chu Mizoram tan hmasawnna rahbi pawimawh a nih thu an tarlang.

Thawhhona thuthlungah hian Mizoram FSL-in kawng hrang hranga hma a sawn theih dan tur duan a ni a, hmaraw la neih loh leh khawl ṭha mamawh angte NFSU ta an hmanpui thei dawn a, case exam theih lohte a ṭul angin an thawn thei dawn. Mizoram FSL a changtlun lehzual theih nan technical support, joint research project, infrastructural development leh special training programme-te NFSU hian a pe ṭhin dawn bawk a ni.