Ministers conference-ah ICT Minister

April 5, 2025 khan New Delhi-a Vigyan Bhawan-ah Conference on State Government Ministers on Strengthening of Statistical Systems neih a ni a; Information & Communication Technology (ICT) minister Dr Vanlalthlana telin, Mizorama Planning department leh Directorate of Economics & Statistics hmalaknate leh hmachhawpte a tarlang.

Conference hi sorkar laipuia Planning minister of state (independent charge) Rao Inderjit Singh-a'n a kaihruai a; state leh union territory hrang hrang aṭanga minister kalkhawmte chu sorkar policy ṭha tak an duan theih nan data rintlak leh changtlung nei tur leh thawhhona ṭha nei turin a chah.

Dr Vanlalthlana hian Mizoram sorkar, a bikin Planning & Programme Implementation department leh Directorate of Economics & Statistics hmalaknate leh hmachhawpte a tarlang a; data leh statistics rintlak hmanga sorkarin thutlukna ṭha zawk a siam theih dante a tarlang bawk.

Conference-ah hian Support for Statistical Strengthening scheme, National Sample Survey, Gross Domestics Product, Index of Industrial Production, Consumer Price Index leh India khua leh tuite tana dataset pawimawh hmun khata dahkhawmna e-Sankhyiki chungchangte sawiho a ni a; MoSPI buatsaih ‘Women & Men in India’, NSSTA website leh MoSPI Micro-Data Portal-te tlangzarh a ni.

Mizoram ICT Minister hi Economics & Statistics director B Lalrinhlua leh assistant director C Vanlalvena ten an ṭawiawm.