PWD Minister-in chhim lam a tlawh

PWD minister Vanlalhlana leh Assembly deputy speaker Lalfamkima te chuan nimin khan Hnahthial leh Sangau khuate an tlawh a; hmasawnna hna thawh turte an en bakah, khawtlang leh sorkar official-te'n an mamawhte an lo thlen.

PWD Minister hnenah hian PWD Hnahthial Division hotute chuan mamawh hrang hrang - office building an la neih loh thu te, staff quarters an mamawh dante leh thawktute indaih lohnate an lo thlen a; hna thawhna tur office mamawh chi hrang hrang bakah, kawng siamna atan JCB, truck, spot mix khâwl an neih loh thute an lo thlen bawk.

Sangau khuaah chuan Community Libraby building-ah inkawmhona hun hman niin, Sangau leh a chhehvel khuate hmasawnna sawiho a ni a; Vanlalhlana chuan, Sangau PHC panna kawng chhe lutuk chu thawm ṭhat tum a nih thu leh, Sangau leh Thaltlang inkar kawng blacktopping chhe lutuk chu PMGSY-4 aṭangin siam a nih tur thu a sawi.

Transport minister Vanlalhlana chuan, Sangau leh a chhehvel tan auto-rickshaw permit leh two wheeler taxi permit a ṭul angin pek a nih tur thu a sawi bawk.

Minister leh Deputy Speaker hi PWD engineer-in-chief H Zoramliana leh a thawhpuite'n an ṭawiawm a ni.