Chief Minister-in NEDP a hawng Traffic Jam Free Aizawl hawn a ni

Mizoram sorkarin policy thar a duan, New Economic Development Policy (NEDP) chu nimin khan chief minister Lal Thanhawla'n Vanapa Hall-ah a hawng a; Aizawl khawpuia traffic a jam lohna atana ruahmanna siam thar, Traffic Jam Free Aizawl City Programme chu Home minister R Lalzirliana'n a hawng bawk.

CM Lal Thanhawla chuan, sorkarin ei leh bar, sum leh paiah intodelh a duh tih sawiin, "Tun dinhmunah ei leh barah thla thum tla tur bak kan thar chhuak lo a, a bak zawng chu ring lo mite hnen aṭangin châwk luh a ngai a, a ropui lo hle. Thlai leh thei ṭhat duhna rama kan hnianghnâr lo hi mipui mimir mawhpuh theih a ni lo ang a, a kaihhnawih department-te'n mawh an phur em tih ngaihtuah a ngai," a ti a; sorkar department-te chu mipui mimir zirtirtu tur an nih thu a sawi.

Chief Minister chuan, sorkarin ṭhahnemngaiin programme ṭha tak duang mah se, mipuiin an zir loh chuan hlawhtlinna a awm theih loh thu a sawi a, "He hnam hian neitu rilru put kan mamawh. Thil dik lo aṭanga a dikah kan luh loh chuan eng ang programme ṭha pawh ni se, a hlawhtling lo ang tih ka hlau hle. Kan ram hi keini'n kan siamṭhat loh chuan tuma'n min siamṭhatsak lo ang tih ngaihtuah a pawimawh," a ti.

Mizo hnam chu sum ngaina hnama a tluk lohna atan ṭan tlan a ngaih thu sawiin Lal Thanhawla chuan, "Kut tling loa sum lak luh hi ram ṭhanmawhbáwk a ni a, kan hmasawnna tur a tiṭhuanawp ang tih a hlauhawm. Ram hmasawnna pawisa lo ei tum phêt a awm thei a, chutah chuan kan tel em tih ngaihtuah a ngai," a ti a; Mizote'n dikna, taimakna leh rinawmna an mamawh thu a sawi.

Home minister R Lalzirliana chuan, "Aizawl khawpuia lên chhuah hrehawmzia kan hre vek a, traffic jam nasa hi tun hma aṭanga awm tawh a ni. Lirthei neite tan garage nei vek tura hmalak a lo ni tawh a, hlawhtling famkim lo mah se, mi tam takin garage an neih phah. Kan thil tih tum hi thil harsa tak ni mah se, kawng awlsam lo su turin tumruhna kan nei. Kan thil tum hi miretheite nghawng miah lo tur a ni," a ti.

Home Minister chuan, taxi intlân chhâwktirin awmzia a neih thu Traffic hotute'n an hrilh tih sawiin, "Hei aia nasa zawka tih pawh a ngai dawnin ka hria. Mimal leh sorkar lirtheite pawh number tawpa 0-9 inkar chu thla khata vawi thum zel ding tura ruahmanna siam a ni. Khawpui veivah harsa lutuk hi tihziaawm a ṭul," a ti a; mimal leh sorkar lirthei intlân chhâwk a nih pawhin, VIP, dan leh thupek keng-kawhtute leh damdawi-in lama thawk-tute chu a huam loh tur thu a sawi.

Inkhawma tarlan danin, Traffic Jam Free Aizawl City Programme hnuaiah hian Mizoram sorkar chuan kum 3/4 chhungin Aizawl chu traffic jam awm lohna khawpuiah siam a tum a ni a; Aizawla lirthei nei zawng zawngte chu ni 426 chhungin garage nei vek tura tih an ni dawn a, thla khat danah garage nei lote chu hriattirna pek thar zel tum a ni.

Ni 426 chhung vêkin kawngpui ṭha lo lai siamṭhain, bus leh taxi tlan dante pawh siamṭhat a ni ang a; zanlai bika lirthei hman tur ruahman tum a ni bawk.

Inkhawm hi State Planning Board vice chairman H Lian-sailova'n a kaihruai a; Finance minister Lalsawta, AMC mayor PC Lalhmingthanga, CS charge latu principal secretary Renu Sharma, Salvation Army commissioner Lalkiamlova, Mizoram Univer-sity-a professor Lianzela leh AMFU president Joseph H Thanzuala te pawhin thu an sawi a ni.